Ekintzailetzaren eta startup-en unibertsoan mugitzeko oinarrizko kontzeptuak - Gaztenpresa

Ekintzailetzaren eta startup-en unibertsoan mugitzeko oinarrizko kontzeptuak

Ekintzailea bazara edo startup batean bazaude, edo arlo horretan sartzeko asmoa baduzu, beharrezkoa da zenbait kontzepturekin ohitzea, zure negozio-ideia garatzeko lagungarriak izan daitezke eta. Kontzeptu horien atzean, oinarrizko alderdi praktikoak daude, ekintzaileok arrakasta-bermeekin ekiteko beharrezkoak, eta oso garrantzitsuak, hala nola zure marketin-estrategia diseinatzeko edo zure negozioaren finantzaketa ulertzeko ezagutu behar dituzun kontzeptuak.

  • Enpresa-azeleragailua. Irabazi-asmoa duten enpresak dira, etorkizun handiko startupak hartzen dituztenak, prestakuntza- eta mentoring-programen bidez azkarrago haz daitezen laguntzeko. Askotariko azeleragailuak daude, baia ia denek ezaugarri bera dute: hasiera-hasieran hartzen dute startupa, eta negozio-eredua eratzen laguntzen diote, bai eta bezeroak erakartzeko estrategia bat prestatzen, hazkunde-aukerak aztertzen eta finantzaketa-iturriak aurkitzen ere. Enpresa-azeleragailu batek har ditzan, startupek lehiakor samarra den onarpen-programa bat gainditu behar dute. Ondoren, beharrezko prestakuntza jasotzen dute, negozio-eredua biribiltzeko, eskalagarritasuna egiaztatzeko, bezeroak lortzeko, etab. Ehun enpresa-azeleragailu baino gehiago daude. Hona hemen ezagunenak: SeedRocket, Lanzadera —Juan Roig Mercadonaren sortzailearena— eta Donostiako Berriup.
  • Enpresa-inkubadorea. Ekintzaileei eta startupei laguntzeko beste tresna bat dira, baina, batik bat, aholkularitza-zerbitzua eta administrazio-egitura eskaintzen dute: tokia, bilera-gelak, konektagarritasuna… Zerbitzu horien ordainean, startup parte-hartzaileek hileko kuota bat ordaintzen dute. Gainera, programaren barruan egon daitezkeen denbora ez dago mugatuta. Zerbitzuak hiru fase izaten ditu: aurreinkubazioa, edo startupek euren proiektuak aditu-talde bati aurkezteko hautespen-prozesua; inkubazioa, enpresa berria esparruan kokatzeko eta adostutako laguntza eta aholkularitza jasotzeko aldia; eta inkubazio-ostekoa, enpresa berriek programak nola bereganatu dituzten egiaztatzeko eta dagokien hazkunde-estrategian bideratzeko fasea.
  • Demo Day. Enpresa-azeleragailu baten lanaren amaieran, Demo Day jardunaldia antolatzen da. Azeleragailuak bere programan parte hartu duten startupen eta epaimahai baten arteko topaketa bat antolatzen du. Epaimahai horretan, inbertitzaile pribatuak, inbertsio-funtsak edo enpresa-arloko pertsona ezagunak egon daitezke. Demo Day jardunaldietan, startupek euren behin betiko aurkezpena defendatzen dute; epaimahaikideen feedbacka ikasteko eta euren aurkezpenak hobetzeko baliatzen dute.
  • Elevator Pitch (igogailuko aurkezpena). Ekintzailetza-proiektu baten aurkezpen-hitzaldia da, eta bezero potentzialen aurrean egiten da. Izen hori ez da ausaz aukeratu; izan ere, igogailu batek ibilbide bat egiteko behar duen denbora (2 minutu baino gutxiago) aipatzen du, eta hori da, hain zuzen ere, ekintzaileak inbertitzaile potentzialen arreta erakartzeko duen denbora. Igogailuko aurkezpenaren helburua ez da zerbait saltzea edo negozio bat ixtea, inbertitzaileen arreta erakartzea eta proiektuaren inguruan ahalik eta interesik handiena sortzea baizik, geroago bilera bat lortze aldera.
  • Gobernu korporatiboa. Enpresa guztiek zenbait arau, printzipio eta prozedura dituzte euren funtzionamendua eta egitura arautzeko. Hori da gobernu korporatiboa. Barruko kontuez gain (hala nola akziodunei eta kontseilu-kideei dagozkienak), kanpokoez ere arduratzen da (bezeroak, kontsumitzaileak, gobernuak, etab.). Besteak beste, hauek dira Gobernu Korporatiboaren Sistemak: estatutu sozialak; enpresaren misioa, ikuspegia eta balioak; politika korporatiboak; organo sozialen eta barne-batzordeen gobernu-arauak; eta kodeak eta erregelamenduak, eta haiek betetzen direla bermatzen duten prozedurak.
  • Crowdfundinga (finantzaketa kolektiboa). Mikromezenasgoa edo crowfundinga proiektuak finantzatzeko elkarlaneko ekonomia-mota bat da. Edozein pertsonak proiektu baten zati bat finantzatu dezake, eta, horren ordainean, diruzkoak ez diren sariak jaso ditzake, hala nola sustatzailearen esker pertsonalizatuak, produktu edo zerbitzu baten lehentasunezko erosketa-aukerak, edo lanpostu bat. Ekintzaileak Interneten ematen du bere ideiaren berri, eta crowdfunding-plataforma baten bidez sustatzen du (horrelako plataforma asko daude). Zenbait crowdfunding-mota daude, baina denek helburu bera dute: jendearen laguntza lortzea.

Gogoan izan gure laguntza eska dezakezula zure ekintzailetza-proiektua aurrera eramateko. Gaztenpresan, zure negozioa sortzeko etapa guztietan lagunduko dizugu: martxan jartzean, izapideetan, finantzaketan, finkatu arte. Orain arte, 4.000 ekintzaileri lagundu diegu. Zuk ere negozio bat martxan jartzen laguntzea nahi duzu? Zain gaituzu.

Iruzkinak 0

Utzi iruzkin bat

Zure e-posta helbidea ez da argitaratuko. Beharrezko eremuak * markatuta daude

*

HARPIDETU

Uso de cookies

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies, pinche el enlace para mayor información.

ACEPTAR
Aviso de cookies

Log in with your credentials

Forgot your details?