y luego Añadir a pantalla de inicio.
Normalean, ekintzaile bati galdetzen diogunean zer marketin-tresna erabiliko dituen bere negozioa ezagutzera emateko, ia guztiek sare sozialak aipatzen dituzte.
Hala ere, pixka bat gehiago sakondu eta zenbait galderari erantzuteko eskatzen diegunean ¾«Eta zer kontatuko duzu sareetan?», «Nola kontatuko duzu?», «Zer maiztasunekin?» eta «Nori kontatuko diozu, eta zer helbururekin?»), lehenengo erantzunaren irmotasunak askotan bide ematen dio zalantzari edo zehaztugabetasunari: «Ez dakit, oraindik ez dut pentsatu»; «Tira, ikusiko dut, pixkanaka»; «Gertatzen denaren arabera, ez zait gauzak planifikatzea gustatzen»; edo «Zer helbururekin? Ba saltzeko. Eta nori? Nire kontutik igarotzen den edonori».
Oker galanta. Sare sozialetan egoteagatik bakarrik egotearen «taktika» ez da ezeren berme, eta ez du esan nahi salmentek gora egingo dutenik, ezta gutxiago ere. Gaur egun, sare sozialetan edukien estrategia hausnartu eta zehatz batekin eta helburu jakin batzuekin murgiltzen diren ekintzaileek bakarrik izan dezakete arrakasta kanal horietan. Horrela bakarrik iritsi ahal izango dira beren negoziorako benetan interesgarria den publikoarengana, eta horrela bakarrik jakingo dute komunikabide sozialetara bideratzen ari diren ahalegina errentagarria zaien ala ez.
Inoiz ez genuke denda bat irekiko salduko dugun generoa zein den jakin gabe eta gure erosle potentzialak nor izan daitezkeen ideia garbi bat izan gabe, ezta? Bada, hein batean, horixe da sare sozialak edukien estrategiarik gabe eta gure edukien xede izango diren pertsonen ideia argirik gabe irekitzea.
Batzuek honako hau pentsatuko duzue beharbada: «Baina, zertarako behar dut nik edukien estrategia bat, Instagramen kontu bat bakarrik izan nahi badut?». Bada, kasu horietan ere komenigarria da bide-orri bat izatea. Lehenik eta behin, egunero zure komunitateari kontatuko diozuna planifikatzeko; kontatuko duzun horrek zer formatu izango duen jakiteko (bideoa, irudiak, reels, stories, IGTV eta abar); promozioak egiteko (zozketak eta/edo publizitatea), zure negozioaren intereserako unerik egokienean; eta azkenik, baina aurrekoak bezain garrantzitsua, ekintza horiekin guztiekin lortuko dituzun emaitzak neurtzeko eta zure Instagrameko kontuarekin ezarrita zenituen helburuak betetzen ari zaren edo ez ebaluatzeko.
Sare sozialetako helburu-motak
Helburu horiek asmo handikoak izan behar dute? Ez dute zertan.
1. Irudi ona
Baliteke, sare sozialei dagokienez, zure helburu bakarra horietan presente egotea dela, konfiantza emango duen irudi on batekin. Zergatik hori? Bada, zure negozioa bizitzen ari den uneagatik (demagun abian jartzen ari dela) eta proiektuan inplikatutako pertsona-kopuruagatik (demagun autonomoa zarela eta zure denda/bulego/zentroko arlo guztiez arduratzen zarela). Kasu horretan, ez da beharrezkoa izango edukiak egunero argitaratzea, baina, gutxi edo aldizka bada ere, eduki horiek zure markaren/negozioaren irudia eta balioak islatu behar dituzte. Era berean, kanal horien bitartez iristen zaizkizun iruzkinei edo mezuei arreta jarri beharko diezu, eta hala badagokio, erantzun egin beharko diezu.
2. Ikusgaitasuna
Demagun, negozioa martxan jarri eta zenbait hilabetetara, baliabide gehiago dituzula eta sare sozialak erabiltzea erabakitzen duzula, zure negozioaren ikusgaitasuna areagotzeko eta zure proposamenen bezero izan daitezkeen pertsona gehiagorengana iristeko. Kasu horretan, orain arte irudi ona mantentzeko erabili duzun komunikabide sozialetako estrategia ez da nahikoa izango, eta berriz diseinatu beharko duzu, helburu berri hori lortzen lagunduko dizuten eduki berriak txertatzeko.
3. Salmentak lortzea
Era berean, zure negozioa ikusgai jartzeko denboraldi batez sareak erabili ondoren, konturatzen zara kanal horiek erabil ditzakezula, halaber, zure dendara eta/edo webgunera trafikoa erakartzeko eta zure produktuak eta zerbitzuak saltzeko. Puntu horretara iristean, ekintza berriekin zabaldu beharko duzu berriz ere zure bide-orria ¾seguruenik, publizitatea sartu beharko duzu sare sozialetan, eta konfigurazioren bat egin beharko duzu, esaterako, Instagram Shopping (Instagramen denda) aktibatzeko¾, helburu berri hori lortu ahal izateko.
Web-mintegia: «Zure negozioaren A, B, C -a Interneten»
Horrez gain, oso garrantzitsua da kontuan izatea ez ditugula helburu horiek guztiak zertan gauzatu. Komunikabide sozialetan helburu horietako bakoitzerako estrategiarik egokiena aplikatzea da kontua, eta zuen kasuan estrategiarik egokiena zein izango litzatekeen ziur ez badakizue, Gaztenpresan doako web-mintegi honetan parte hartzera gonbidatzen zaituztegu: «Zure negozioaren A, B, C -a Interneten» (Zoom bidez).
No te pierdas en las redes marketin digitaleko agentziaren eskutik, saio horretan, sare sozialetako edukien estrategia bat diseinatzeko orduan kontuan izan behar diren alderdiak jorratuko ditugu. Horrez gain, zure negoziorako erabilgarriak izan daitezkeen marketin digitaleko beste tresna batzuk ikusiko ditugu (webgunea, merkataritza elektronikoa, email marketina, web-analitika, SEOa eta abar), baita bezeroen erosketa-prozesuko fase bakoitzean nola erabili behar diren ere:
- Bezeroak erakartzea.
- Konbertsioa.
- Salmenta.
- Fidelizazioa.
Ziur gaude web-mintegi hau oso lagungarria izango dela proiektu handi bati ekitea aurreikusten duzuen ekintzaileentzat nahiz proposamen xumeagoak dituzuen sustatzaileentzat. Izan ere, negozio bat martxan jartzen denean inork ez du denborarik edo dirurik soberan, ezta?
Web-mintegia gomendagarria da, halaber, komunikabide sozialetan eta marketin digitaleko beste tresna batzuetan lehendik lan egiten ari zineten negozioentzat, kanal horietan egoteko modua birplanteatu nahi baduzue, edo, besterik gabe, baliabide horiek erabiltzeko orduan eraginkorrak izaten ari zareten edo ez jakin nahi baduzue.
Hortxe izango gaituzue!
