y luego Añadir a pantalla de inicio.
Gaztenpresaren jarduera jarraitu ohi duzuen pertsonei ziur Elsa Pamparacuatro eta Keko Salvador izenak ezagunak egiten zaizkizuela. Ekintzaile bikote hau Gernikako Txitatoki zirku eskolaren sustatzailea da, iaz Donostian antolatu genuen Gaztenpresatik topaketan esan ziguten bezala.
Han jakin genuen zentro honek, landa-eremuan zirkuko arteen praktika hurbiltzea eta sustatzea ez ezik, pertsonen garapen pertsonalerako eta gizarteratzeko tresna gisa ere erabiltzen dituela. Horregatik, Elsa eta Keko ezin ziren falta ekonomiari eta inpaktu sozialari eskainitako gure podcastaren hirugarren denboraldi honetan..
Atal honetan, Txitatokiren jatorrian murgilduko gara. Txitatokiaren lehen egoitza ukuilu bat izan zen, bizilagunen laguntzarekin birgaitu ostean. Leku horretan, duela hamar urte hasi ziren lehen aireko, akrobazia, malabar, oreka eta clown klaseak ematen.
Ondoren, Kekok zirkuaren pedagogiako unibertsitate-gradua egin zuen Madrilen, eta horrek zirkuko diziplinek behar bereziak dituzten pertsonei ematen dizkieten onurak ezagutzera eraman zuen. Elsarekin partekatzean, biek argi izan zuten irakaskuntza horiek Busturialdea-Urdaibai eskualdean aplikatu nahi zituztela, baina, horretarako, gune irisgarri eta egokitu bat behar zuten, eta ukuilua ez zen egokia.
Horrela hasi ziren Txitatokirentzako leku berri baten bila eta, azkenean, Gernikan pabiloi bat aurkitu zuten, 2020an lekualdatu ziren eta gaur egun eskolak ematen dituzte bertan.
Guztiontzako gunea
Zentro berri horrek aukera ematen die Hazitoki proiektua garatzeko. Proiektu horren helburua da premia bereziak dituzten pertsonak zirkuaren bidez gizarteratzea, eskola erregularretan integratuz eta bizikidetza eta elkarrekiko ikaskuntza sustatuz. “Gure helburua da edozein pertsona, bere gaitasunak alde batera utzita, eskola erregularretan sartzea eta taldeko kide sentitzea”, dio Elsak.
Ikuspegi inklusibo horrek, premia bereziak dituzten pertsonei mesede egiteaz gain, aniztasunarekin bizitzen eta enpatia eta tolerantzia garatzen irakasten die gainerako ikasleei. Izan ere, Elsak dioen bezala, “tolerantzia bizikidetzan oinarritzen da, eta bizikidetza tolerantzian oinarritzen da”.
Zirkuak aukera ematen dio pertsona bakoitzari bere oztopoak gainditzeko, oztopo fisiko edo mentalak direnak direla ere, eta, aldi berean, ondoan duzun pertsonari nola lagundu erakusten du. Hori ona da taldearentzat, eta ez ditu kaltetzen pertsona bakoitzak ezarri dituen helburuak.
Filosofia horren ondorioz, Txitatokik gainditze pertsonal eta biziko hainbat istorioren lekuko izan da, hala nola, garun-paralisia zuen ikasle batena, ohean ezin zuena ezta biratu eta, posizio txarrean geratuz gero, itotzeko arriskua zuena. “Orain, biratu ez ezik, itzulipurdiak ere egiten ditu”, dio harro Elsak.
Zirraragarria, ezta? Istorio hau eta askoz gehiago izango dituzu zain atal osoan, eta ikusiko duzu zirkuak nola lagun dezakeen gizarte toleranteago eta inklusiboago bat eraikitzen. Ez galdu!
