y luego Añadir a pantalla de inicio.
Gaztenpresaren podcastean, kubaldun honekin (jaiotzez kubatarra eta bihotzez euskalduna) hitz egin dugu. Ekintzaile peto-petoa da, eta ez da konformatu bere proiektuak abiaraztearekin, baizik eta, gainera, ekintzailetzarako grina partekatzen du Euskadira migratutako emakumeekin, kolektibo horrek negozio bat abian jartzeko orduan dituen oztopo gehigarrien jakitun.
Laguntza eta ulermenerako gune bat
Lan hori egiteko, Maylin Vergarak Emakume Migratu Ekintzaileak elkartea sortu zuen 2018an, gaur egun 126 kidek osatzen duten komunitatea. Helburuetako bat da prestakuntza eta laguntza emozionala ematea Euskal Autonomia Erkidegoan bizi diren eta ekin nahi duten edo ekitea planteatzen ari diren beste herrialde batzuetako emakume guztiei.
Helburu horrekin, hainbat ekimen garatzen dituzte, hala nola “Errealitate berriak sortuz”, parte hartzen duten emakumeei ekintzailetza- eta emozio-trebetasunei buruzko tailerrak eta prestakuntzak eskaintzen dizkiena, bazkideak izan ala ez, eta “Berdintasunean elkarbiziz”, familiak ekintzailetza-prozesuan inplikatzen dituena laguntza-ingurune bat sustatzeko. Halaber, “Konektatuak” programa ere badute, non emakume migratu ekintzaile eskarmentudunek hasten direnentzat aholkulari gisa jarduten duten.
Eta, inor ekimen horietatik kanpo gera ez dadin, Emakume Migratu Ekintzaileak-ek, adibidez, haurtzaindegi-zerbitzuak eskaintzen dituzte prestakuntzetan. Horrela, emakume ekintzaileei laguntza-sare sendo bat eskaini nahi diete, arreta haien hazkunde pertsonalean eta profesionalean jar dezaten eta denboran iraunkorrak diren proiektuak garatu ahal izateko.
Emakume migratzaile ekintzaileak ikusaraztea
Elkartearen beste helburu nagusietako bat emakume migratuen ekintzailetzari ikusgarritasuna ematea da; izan ere, Maylin Vergarak dioenez, “ikusten ez dena ez da existitzen”. Alde horretatik, erakundea, bere webgunearen eta sare sozialen bidez bazkide diren emakume ekintzaileen negozioei laguntzeaz gain, jarduera horiek guztiak bilduko dituen direktorio profesional bat garatzen ari da.
“Migratua naiz eta zure auzoan bizi naiz” ekimena ere martxan dute. Ekimen horren bidez, topaketak sustatzen dituzte auzoetan, bereziki Bizkaian, estereotipoak hausteko eta emakume migratuek tokiko ekonomian ekarpen nabarmena egiten dutela erakusteko..
Maylinek badaki emakume migratu askok premiagatik ekiten dutela – “45 urteko eta 50 urteko emakume batzuk orain ekiten ari dira haientzat enplegurik ez dagoelako” –, baina ziur dago “gizarte ekintzailea gizarte askea” dela, “ametsen atzetik joateko gai den gizartea delako”.
Interesgarria, ezta? Horrelako gogoeta gehiago entzun nahi badituzu eta Emakume Migratu Ekintzaileak elkarteak egiten duen lana hobeto ezagutu nahi baduzu, osorik entzutera gonbidatzen zaitugu. Sakatu “play”!
