y luego Añadir a pantalla de inicio.
Izena emateko epea: 2014ko urriaren 1etik 2015eko urtarrilaren 31ra. Lanak entregatzeko azken eguna: otsailaren 28a.
Gaztenpresak urte batzuk daramatza Nafarroako Unibertsitateko Ingeniaritza Eskolak (TECNUN) antolatzen duen lehiaketa laguntzen, eta Espainiako estatuko ikasle guztiei dei egiten die sormena eta berrikuntza oinarri dituen ekimenean parte hartzera.
Duela sei urte ekin zioten lehiaketa antolatzeari, eta partaidetza aldetik oso arrakastatsua izan ohi da. Honako hauek dira lehiaketaren helburuak:
- Pentsamendu kritikoa sustatzea. Jakin-mina eta behaketa bultzatuko dituen gogoa.
- Berrikuntza eta ekintzailetzarekin, sormena eta talde-lanarekin lotutako balioak eta jarrerak sustatzen laguntzea.
- Berrikuntza eskolaren eta unibertsitatearen eremura eramatea.
DBHko 4. mailako eta Batxilergoko 1. eta 2. mailako ikasleei bideratuta dago lehiaketa. Ilusioa eta ideiak besterik ez dira behar parte hartzeko. Gehienez 3 laguneko taldeetan har dezakete parte gazteek, baita bakarka ere. Kiroleko edo teknologiako produkturen bat hobetzera bideratu beharko dute euren sormena eta asmamena. Kiroletako edo teknologiako produktuaren funtzionaltasuna, ergonomia, segurtasuna, eraginkortasuna, fidagarritasuna eta abar hobetzea izan daiteke berrikuntzaren xedea. Ideia berriaren eta horren diseinuaren azalpena ebaluatuko da.
Azken edizioan 65 ikastetxetako ia 300 ikaslek hartu zuten parte, eta haiekin lanean jardun zuten irakasle gehienak honako arlo hauetakoak izan ziren: Mundu garaikiderako zientziak, Ordenagailuz lagundutako diseinua, Informatika, Gorputz Hezkuntza, Teknologia, Marrazketa Teknikoa eta Artistikoa, Fisika, Matematikak eta Ekonomia.
Interesatuta bazaude, informazio gehiago aurkituko duzu TECNUNen webgunean: http://www1.tecnun.es/ingenio/intro.htm
