y luego Añadir a pantalla de inicio.
Ekitea dirua irabaztea baino askoz gehiago da: ekimena, pasioa, ilusioa, ahalegina, sakrifikatzeko gaitasuna, erresilientzia… eta beste ezaugarri osagarri pila bat. Ekintzaile batek proiektu berri bat nola martxan jarri aztertzen duenean, helburu bat izan behar du, proiektu hori bizimodua ateratzeko tresna hutsa baino zerbait gehiago bihurtuko duen motibazio jakin bat.
Helburua eta urrezko zirkulua
Eta zer da zehazki helburua? Galdetuko diozu zeure buruari. Euskaltzaindiak honako definizio hau ematen digu: «Lortu edo egin nahi den gauza, nahita bilatzen dena». Hortaz, definizioan horrenbeste azpimarratu dugun «nahi» hori aplikatzeko modurik egokiena nabarmenduko dugu hurrengo lerroetan.
Kontzeptu hori azaltzeko, ez dago Simon Sinek baino hoberik. Idazle eta motibatzaile ingeles horrek lidergo inspiratzailearen eredu sinple baina boteretsu bat diseinatu zuen. Eredu horretan, dena oinarritzen da berak «urrezko zirkulua» deritzonean eta galdera honetan: «zergatik». Ez al diozu inoiz galdetu zure buruari pertsona eta erakunde batzuek zergatik inspiratzen gaituzten eta beste batzuek ez? Sinekek bere aurkikuntza ezagutarazi zuen, eta, haren bidez, erabat aldatu zuen munduari buruzko bere ikuspegia, baita bere jardunbidea ere. Haren teoriaren arabera, munduko lider eta erakunde inspiratzaile garrantzitsu guztiek ¾Apple, Martin Luther King eta Wright anaiak, besteak beste¾ modu berean pentsatzen eta jarduten dute eta modu berean komunikatzen dira, gainerako guztiena ez bezalako modu batean, hain zuzen. Aurkikuntza hori egin ondoren, patroia kodetu eta «urrezko zirkulua» deitu zion.
Erakundeen % 100ek badakite zer egiten duten. >Batzuek badakite nola egiten duten (balio-proposamena esaten dioguna); baina oso gutxik dakite zergatik egiten duten.
«Zergatik egiten dute erakundeek egiten dutena?» galderaren erantzuna da, hain zuzen ere, helburua. Gaur egun spoilerrak oso modan daudenez, spoiler bat egingo dugu: ez da dirua irabaztea. Hori emaitza da beti, baina ez arrazoia. Jarraian azalduko dizugu zein den.
Nola aplikatu helburua negozioetan
Helburua horren elementu garrantzitsua bada, nola aplikatu ekintzailetzaren unibertsoan? Zertarako balio dezake?
Ekintzaile gisa, zure negozio-ideiaren azterketa egin beharko zenuke: Zer betebehar du? Zergatik existitu beharko luke edo existitu behar du? Zein da haren izateko arrazoia eta zergatik axola beharko litzaioke zure xede-publikoari edo edonori? Galdera horien erantzunek osatzen dute helburua, eta horiek izan behar dute zure ideiaren edo proiektuaren komunikazioa eraikitzeko oinarria.
Horregatik, Simon Sinekek azaltzen duen moduan, komunikazioa barrutik kanpora egin behar da.
Teoria hori biologiaren printzipioetan oinarrituta dago. Giza garunaren zeharkako ebakidurari so eginez gero, hiru osagai nagusitan banatuta dagoela ikusiko dugu, eta osagai horiek bat datoz ezin hobeto urrezko zirkuluarekin.
- Gure neokortexa «zer» mailari dagokio, eta gure pentsamendu arrazional, analitiko eta linguistiko guztien erantzule da.
- Erdiko sekzioek gure garun linbikoa osatzen dute, eta hori arduratzen da sentimenduez, hala nola konfiantzaz eta leialtasunaz. Bera da, halaber, giza portaera ororen eta erabakiak hartzearen erantzule, baina ez du hizkuntzarako inolako gaitasunik.
Beste hitz batzuetan, kanpotik barrura komunikatzen garenean, gure publikoak informazio konplexu asko uler dezake, hala nola ezaugarriak, onurak edo zifrak, baina horrek ez dio jokabiderik eragingo, eta ez da oso inspiratzailea. Barrutik kanpora komunikatzen garenean, berriz, portaera eta erabakiak kontrolatzen dituen garuneko zatiarekin hitz egiten dugu zuzenean, eta, beraz, entzuleek egunerokotasunean esaten eta egiten dutenarekin aldera dezakete, euren sinesmenekin, alegia; eta askoz errazagoa izango da ekintza bat eragitea.
Jar dezagun adibide argi bat: enpresa bat duzu eta hautaketa-prozesu bat abiarazi duzu. Helburua ez da lana behar duten pertsonak kontratatzea, zuk sinesten duzun horretan sinesten duten pertsonak kontratatzea baizik. Lan egin dezaketelako bakarrik kontratatzen badituzu langileak, orduan diruagatik lan egingo dute. Zure sinesmen berberak dituzten pertsonak kontratatzen badituzu, berriz, beren odola, izerdia eta malkoak jarrita lan egingo dute.
Negozio-helburu bat izatearen abantaila
Negozioaren ikuspegitik, leit motiv hori duten enpresek hobeto egiten diete aurre egoera korapilatsuei, eta erresilientzia-gaitasun handiagoa dute. Ekintzailetza mundu liluragarria da, bai, baina baita erronkaz betea ere, eta zailtasun-garaietan, helburuak ematen duen motibazio gehigarri horrek palanka eragile gisa jardun dezake arazo jakin batzuei aurre egiteko orduan.
Kontsumitzailearen ikuspuntutik, marka batekin konektatzen duten eta harekin harreman emozional bat duten pertsonak leialagoak dira, eta horrek handitu egiten ditu salmentak: Capgeminik egindako azterketa baten arabera, «Espainia laugarren postuan dago kontsumitzaileek lotura emozional gehien duten herrialdeen sailkapenean, eta hala ziurtatzen du inkestatuen % 51k».
Oro har, amets edo desioak ekintzailetzarekin uztartzearen emaitza da helburua; haren bidez, nolabaiteko inpaktua eragin dezakezu gizartean, eta zuk bezala pentsatzen duten pertsonak erakar ditzakezu. Zure negozio berriaren errentagarritasuna handitzeko laguntza behar baduzu, Gaztenpresan izango gaituzu, aukera guztiak aztertzen laguntzeko.
