×

Para instalar Gaztenpresa en tu iPhone pulsa y luego Añadir a pantalla de inicio.

Navegación limitada - Sin conexión

Growth Hackinga, funtsezko tresna startup edo enpresa hasiberrientzat?

growth-hacking
Share on facebook
Share on twitter
Share on linkedin
Share on whatsapp
Share on email

Startup bat, produktu edo zerbitzu on bat eta horiek sustatzeko baliabide oso gutxi dituzula? Sormen handiko norbaiten bila zabiltza, istant batean jakingo duena zure enpresari loratzen laguntzeko zer kanal eta ekintza zehatz behar duzun? Growth hacker bat behar duzu; egia esan, nork ez?

Agian ez duzu oraindik Growth Hacking diziplinaz edo lanbideaz ezer entzun; baina, jakizu Espainian dagoeneko badaudela horren inguruko graduondokoak, eta merkatu-gosea duen startup orok izan beharreko lanpostu gisa finkatu dela Ameriketako Estatu Batuetan.

Baina, goazen urratsez urrats. Enpresa berri bati ahalik eta baliabiderik gutxien erabiliz hazten laguntzean oinarritzen da Growth Hacking delakoa. Marketinaren Rosetta harria da, beraz. Metodoa da diziplina hau salmenta-teknika digitaletatik bereizten duena. Baliabideak dituen konpainia batek ohiko marketin-teknikak (publizitatea, posta elektroniko bidezko propaganda-banaketa eta abar) erabiltzen ditu; growth hackerrak, berriz, sormena eta jakin-mina baliatzen ditu, eta aztertzeko gaitasuna. Startuparen ekintza eta jarduera guztiak aztertzen ditu, aurrena, eta horien balioa eta etekinak kalkulatzen ditu, bezero kopurua edo lortutako leadak (helburuak) aintzat hartuta.

Datu horiekin konparazioa egiten du. Alabaina, ez da ekintzarik errentagarrienak identifikatzera mugatzen (horiek sustatzeko), haratago joaten da. Growth hackerrak efektiboenak hautatu, aztertu, hobetu eta kasuan kasuko produktu edo zerbitzura egokitzen ditu, are eraginkorragoak izan daitezen. Hortxe sartzen da haren sormena jokoan: aurretik aplikatutako ekintzetan oinarrituz, berriak asmatu eta haiekin saiakerak egiten ditu, itxura batean zentzugabeak izan arren.

Eroen eta growth hackerren arteko aldea hauxe da: lehenari diru asko kostatuko zaio burutapena; bigarrenaren kasuan, berriz, haren teknikak aztergai bihurtuko dira.

Growth hackerraren dohain ugarien artean, jakin-mina dago: ez bakarrik zehatz-mehatz aztertzeko kanpaina batek arrakasta eta beste batek porrota zergatik izan duten (horretarako badaude A/B testak), baizik eta JAKITEKO onlineko gure 5.000 bezeroetatik BATEK zergatik erabaki duen gure newsletterrean baja ematea edo bere erregistro-datuak ezabatzea. Goseak ahalbidetzen dio ezer zoriaren pean ez uztea, arretatsua izatea eta guztia ulertzen saiatzea.

Hona bitartean dena ondo; metodoak ere, ordea, baditu bere ñabardurak. Izan ere, growth hackerrak badu beste ezaugarri berezi bat ere: zenbaitetan, haren metodoek gainditu egiten dute ohiko jardunbidea, eta etikotasunaren eta zintzotasunik ezaren arteko lerro estuan mugitzen dira. Halere, beti gertatu ohi denez, eragileetan dago hori, ez diziplinan; ez da hala?

Growth Hackingaren adibideak

Ezagutu ditzagun Growth Hackingaren adibide batzuk, errazago uler dezazun.

Ezagunenetako batek Airbnb izan zuen protagonista. Etxebizitza pribatuak alokatzeko plataforma Craiglistez, iragarki sailkatuen webguneaz, baliatu zen, haren arrakastari esker hazteko. Norbaitek Airbnb enpresan iragartzen zuenean ostatua, Craiglisten ere argitara zezakeen zuzenean, irismena handitzeko.

Arrakasta berehalakoa izan zen, eta gaur egun den erraldoia izaten lagundu zion Airbnbri. Hala eta guztiz ere, ideia hori ez zen erraz bideratzekoa izan ikuspegi teknikotik… eta legezkotik: Airbnbko ingeniariek arrakalak bilatu behar izan zituzten Craiglisten kodean, haietaz baliatu ahal izateko. Eta beste kode bat ere arakatu behar izan zuten, penala, egiten ari zirena legez kontrakoa ez zela ziurtatzeko.

Craiglistek aspaldi estali zituen arrail horiek, eta gertaera errepikatzea eragotzi zuen; baina, ordurako, Airbnbk ez zuen haren beharrik.

Zuk gauza bera egingo zenukeen, ekintzaile moduan?

Dropboxek asmatu zuena da beste adibide bat, ez hain oldarkorra, ordea. Fitxategiak hodeian biltegiratzeko plataforma birtual horrek hazteko metodo berezia asmatu zuen: erabiltzaileei biltegiratzeko espazio handiagoa eskaini zien doan, besterik gabe bost laguni aplikazioa erabiltzeko gonbita luzatzeagatik. Egundoko hazkundea izan zen emaitza, eta marketin-lana beste batzuek egin zuten beraren ordez.

Amaitzeko, denbora gutxian 2 erabiltzailetik 200 milioi erabiltzaile izatera pasatu den enpresaren kasua ezagutu behar zenuke. LinkedIn du izena. Enplegurako sare profesional horrek profil publikoak sortzean oinarritutako teknika erabili zuen. Profilok bilatzaile nagusien emaitzetan agertzen dira modu organikoan (ordaindu gabe); horrela, pertsona edo enpresa bat bilatzen duzun bakoitzean, seguru asko LinkedIneko profila agertuko zaizu lehen emaitzen artean. Gogoratzen edo imajinatzen duzu prozesu hori nolakoa zen sare sozial hori asmatu aurretik? Ez, ezta?

Post hau irakurri ondoren, erakartzen zaitu Growth Hackingak? Zure ustez zer da: buzzword edo modako hitz soil bat ala startup orok izan beharreko tresna edo diziplina bat?

Post gehiago irakurri.

Ekaina 7, 2023
Laida San Sebastianena izan zen Gaztenpresatik ekimenean jasotako azken testigantza. Gizarte arloan ia 20 urtez ekintzaile izan ondoren, orain Mondragon Unibertsitateko Eskola Politeknikoko ikasleekin partekatzen ditu bere ezagutzak eta esperientziak, Ekintzailetza Teknologikoko arduraduna baita han. “Ni naiz guztiari ‘bai’ esatearen asmatzailea”, aitortu zuen Laidak keinu bat eginez Andrea Fernandezek egin zuen aurreko mintzaldiari. Hain zuzen...
Maitza 31, 2023
Andrea Fernández-ena izan zen Gaztenpresatik ekimenean ezagutu genuen beste ekintzailetza-istorioetako bat. “Argentinar doinurik ez duen ekintzaile argentinarra eta erremediorik gabeko ibiltaria” da. Orain dela 20 urte baino gehiago etorri zen Andrearen familia Bilbora, hark hamabi urte baino ez zituenean. Bizitza pertsonalaren eta profesionalaren arteko orekari eusteak duen garrantziaz hitz egin zigun arlo anitz jorratzen dituen...
Maitza 23, 2023
Mahai-inguruaren ondoren, beren ibilbideko uneren batean Gaztenpresara gure aholkularitzaren bila etorri diren ekintzaileen benetako historiak entzuteko txanda iritsi zen Gaztenpresatik blogean. Hala, Elsa Pamparacuatro eta Keko Salvador ezagutu genituen, Iruñeko zirku-eskolan elkar ezagutu zuten bi artista. Amets bat zuten: Urdaibain zirku-eskola sortzea. Lehenengo aukera izan zen Gautegiz-Arteagan bizi ziren baserriko ukuilua egokitzea. “Han hasi ginen...
Maitza 17, 2023
Duela egun gutxi batzuk gure 2022ko Memoria aurkeztu genuen Donostian. Izan ere, aurten Donostia Gizarte Ekonomiaren Hiriburu izendatu dute. Prentsaurrekoaren ondoren, Gaztenpresatik ekitaldia egiteko aprobetxatu genuen, hain zuzen ere, gure erkidego ekintzailea inspiratu, motibatu eta babesteko ekitaldia. Topaketa hau oso mamitsua izan zenez, eta ezer ez ahazteko, bertan gertatu zen guztia kontatzea erabaki dugu. Has...
Apirila 28, 2023
Gure inguruko errealitate soziala hobetzeko helburuari jarraikiz, Gaztenpresan 314 negozio berri abiarazten lagundu dugu 2022an, eta horiei esker 637 lanpostu sortu dira. Hori horrela izanik, ia 30 urteko ibilbide honetan, 6.578 enpresa eta 12.041 enplegu sortzen lagunduko dugu, eta LABORAL Kutxaren bitartez 192 milioi euro lortzeko aukera eman dugu, mailegutan. Datu horiek guztiak gure 2022ko...
Apirila 17, 2023
Guztion ahotan dago Adimen Artifiziala (AA), eta ChatGPT tresnari zor zaio bere ospearen zati handi bat. Tresna hori OpenAI enpresak merkaturatu zuen joan den urtearen amaieran, eta guztiok harrituta utzi gaitu galderei erantzuteko, elkarrizketak izateko eta testuak modu natural eta koherentean sortzeko duen eraginkortasunagatik eta zehaztasunagatik. Tresna horrek zer egin dezakeen ikus dezazuen, pentsatu dugu...