y luego Añadir a pantalla de inicio.
Gaztenpresak eta Youth Business-ek ekintzaile gazteei zuzendutako Mentoring Programako mentoring-managerra da Ana Artetxe (Bilbo, 1965). 25 urte baino gehiagoko eskarmentua du, eta tresna horren gakoak xehatzen ditu elkarrizketa honetan, bai eta ekintzaile izateko bizi dugun “une ona” deskribatzen ere. Artetxeren ustez, ekiteko beharrezkoa da behar adina gaitasun, besteekiko bereizteko ideia bat eta onenen laguntza, Gaztenpresak eta YBS-ek eskaintzen duten modukoa, izatea.
BLOG GAZTENPRESA: Mentoring programak gidari pertsonalizatua eskaintzen dio pertsona ekintzaile bakoitzari; mentore horiek, gainera, boluntario gisa egiten dute lan hori. Zein da haien profila?
ANA ARTETXE: Horrela da. Mentoreen boluntariotza- eta altruismo-esperientzian oinarritzen da programa. Pertsona ekintzaileek ez dute ezer ordaindu behar zerbitzuagatik. Gure mentoreak, kasu gehienetan, jardunean dauden eta jarduera profesional sendoa duten pertsonak izan ohi dira. Hona hemen programan sartzeko bete beharreko baldintzak:
-Ekintzaileak edo ekintzaile izandakoak izatea.
-Enpresa-gestioan eskarmentu handia izatea, enpresa eta negozio askorekin lan egin izanagatik.
-Hilean programaren inguruko bilera bat edo bi egiteko prestasuna izatea.
-Gazteei laguntzeko gutxieneko jarrera eta tresnak izatea.
Hori horrela, programan Laboral Kutxako pertsonak ditugu, gestioan eskarmentu handia dutenak eta laguntzeko gogoa eta jarrera bikaina dituztenak. Eta baditugu beste enpresa batzuetako pertsonak eta enpresariak ere, ezaugarri berak dituztenak. Sexuari dagokionez, % 30etik gertu dago emakumeen ehunekoa. Gure asmoa ehuneko hori handitzea da.
GZT: Zer nolako harreman-mota sortzen da mentoreen eta ekintzaileen artean?
A.A: Mentorearen eta ekintzailearen artean laguntza-, egiaztatze- eta gidaritza-harremana sortzen da. Helburua pertsona sustatzailea gestio-gaitasunetan trebatzea da eta haren negozioa sendotzea, hazkuntza- eta laguntza-harremanak zaintzearekin batera. Programaren iraupena urtebetekoa da, hilean bilera bat edo bi egiten direlarik. Beti ere, negozioaren helburuen arabera. Beharrezkoa bada, harremana beste urtebetez luza daiteke. Baina inoiz ez bi urte baino gehiagoz, mendekotasun harremanik egon ez dadin.
GZT:Ekintzaileentzako abantailak garbi ikus daitezke, eskarmentua duen gidaria izango baitute alboan, baina: Zein dira mentoreen abantailak?
A. Mentoreek programan parte hartzeko hainbat motibazio adierazten dituzte. Gehienek, honako hauekin dute zerikusia: jasotakoaren zati bat gizarteari bueltatzearekin, esperientzia partekatzearekin, aukera honetatik ikastearekin, enpresak sendotzen laguntzearekin, gazteak enpresa-garapenean babestearekin eta enplegua sortzeko laguntza ematearekin. Esperientzia oso aberasgarria izan daiteke bi aldeentzat.
Ekintzaileen arazo eta zalantza komunik
GZT: Gaztenpresak harremanaren bilakaeraren jarraipena egiten du. Antzeman al duzue ekintzaile guztien artean arazo eta zalantza komunik? Antzekoak al dira kezkak, sektore desberdinetatik badatoz ere?
A.A: Zailtasun ohikoenak negozioaren antolaketa eta estrategiarekin, zerbitzu edo produktuen komertzializazio esparruarekin eta sare eta itunak sortzearekin loturikoak dira. Hainbat sektoretan agertzen da gaitasun horien garapenaren inguruko kezka. Gogoratu behar da programa enpresa bat sortu duten 36 urtez azpiko gazteei zuzendua dagoela; haietako askok, ez dute aurretik esperientziarik gestioan.
GZT: Une egokia al da ekintzaile izateko? Ba al dute ekintzaileek beste tresnarik erabilgarri?
A.A: Egungo merkatua oso lehiakorra da, eta geroz eta kualifikatuagoa. Unea egokia izan daiteke, pertsona ekintzaileak gaitasunak eta besteengandik bereizteko elementuak dituen ideia bat baldin badauzka. Ekintzaile izatea ez da panazea. Pertsona askorentzat irtenbide duina da pertsonalki eta profesionalki, baina ez guztientzat. Aldagai horiek kontuan izaten baditugu, une egokia da, nire ustez. Mentoring Programa ere tresna oso interesgarria da negozioak sendotzeko; tresna berritzaile gehigarri bat da. Hala adierazten dute bertan sartzen diren pertsonek, mentoreak nahiz ekintzaileak izan, bai eta YBS-en (Youth Business Spain) baitan egindako hainbat ikerketek ere.
