Nola bihurtu langabezia ekiteko aukera bat

Langabezia-egoeran egotea momentu ezin hobea da autoenplegurako proiektuak eta ekimenak martxan jartzeko, besteen kontura lan egiten jarraituko bagenu askoz ere zailagoa izango bailitzateke horiek gauzatzea.

Lan-munduan dagoeneko esperientzia badugu, prestakuntza eta laneko urte horietan zehar lortutako ezagutzak aplikatzeko unea da. Horiek ekintzailetzara eramateko unea da, baina presarik gabe. Ezagutza teorikoak dituen ikaslea bazara ere badira ekiteko aukerak, aparteko ahalegina egin beharko baduzu ere.

Ekintzailetzari buruzko munduko zenbait txostenen arabera, pertsona ekintzaileak dira munduko zoriontsuenak, betiere halabeharrez ekiten ez badute. Ekintzailetzak norberak nahi duelako hartutako erabakia izan behar du, ez irtenbide profesional bat.

Bi egoera horietakoren batean bazaude eta ekiteko ekimena hartu behar baduzu, orduan enpresa bat sortzeko 5 urratsak (ideia, negozio-plana, izapideak, finantzaketa eta negozioa sendotzea) ematen hasi behar duzu.

Langabezia-egoera prestazioduna

Langabezia-egoeran bazaude, ordaindutakoaren araberako prestazio bat jasotzen baduzu eta baldintza batzuk betetzen badituzu, Administrazioak hainbat formula eskaintzen dizkizu zure ekintzailetza-proiektua finantza dezazun:

• Prestazioa lanarekin bateragarri egitea. Dirua partzialki jaso eta langabeziagatiko prestazioa norbere konturako lanarekin bateragarri egin dezakezu, gehienez ere, 270 egunetan.
• Prestazioaren zenbatekoa kapitalizatzea. Langabeziagatiko prestazio osoa ordainketa bakar batean ordain diezazula eska diezaiokezu Administrazioari, zure enpresa sortu ahal izateko.
• Autonomo berrientzako hobaria. Lehen 6 hilabeteetan zehar hilean 50 €-ko kuota ordain dezakezu ordura arte besteen kontura lan egin baduzu edo langabezian egon bazara eta autonomoen araubidean izena ematea erabaki baduzu. Hurrengo bi urteetan zehar, kuota igo egingo da pixkanaka, % 100era iritsi arte. 30 urtetik beherako gizonek eta 35 urtetik beherako emakumeek % 30eko hobari gehigarria dute.

Laguntza horiei esker, bultzada txiki bat eman ahal izango diozu zure negozio-ideiari, zure egoera pertsonala dena dela. Dena den, zure proiektua sortzen lagunduko dizuten zenbait premisa izan behar dituzu kontuan:

• Ezagutu zure burua eta zure lehia: Ezinbestekoa da horien lana zurearekin alderatu ahal izatea eta ebaluatzea.
• Izan zaitez malgua, eta ez egin uko aldaketei: Oso ohikoa da lehenengoan ez asmatzea. Ez izan zure negozio-eredua aldatzeko beldurrik.
• Arriskua neurtu behar duzu: Probatu gauza berriak, baina modu kalkulatuan. Gogoratu merkatuak agintzen duela eta gauza berriak proposa diezazkiozula, baina inoiz ezingo diozu horiek onartzera behartu, hala nahi ez badu.
• Egunera zaitez: Teknologia berriak zure aliatuak dira eta zure negozioan hazteko aukera eskain diezazukete.

Unibertsitatearen ostean ekitea

Unibertsitateko ikasketak oraintxe amaitu badituzu, Gazte Ekintzailetza programaz balia zaitezke; haren bitartez, Eusko Jaurlaritzak eta EHUk autoenplegua sustatzen dute kolektibo horretan. Onartutako proiektu bakoitzak 6.600 euro jasoko ditu, eta hainbat tutorek enpresaren prestakuntza-prozesua egiaztatuko dute.

2014/2015, 2015/2016 eta 2016/2017 ikasturte akademikoetan unibertsitate-titulu bat lortu dutenei (diplomatura, lizentzia, ingeniaritza, arkitektura, gradua edo unibertsitate-masterra), edo 2017/2018 ikasturte akademikoan ikasketa horien azken urtean matrikulatu direnei bideratuta dago.

Gaztenpresan, zure enpresa sortzeko eman behar dituzun urrats guztiak zehazten lagunduko dizugu, eta ekintzailetzara bideratutako zenbait tailerretan parte hartzera gonbidatzen zaitugu.