y luego Añadir a pantalla de inicio.
Likideziarik eza da gaur egun enpresen arazo nagusietako bat. Askotan, berankortasuna da gabezia horren eragilea, hau da, bezeroengandik jaso beharreko kobrantzak atzeratzea, baita haien kaudimengabezia ere, krisialdi ekonomikoaren urterik txarrenetatik datorkiena.
Hona hemen arazo hori islatzen duen datua: urteko lehen 10 hiletan, enpresen kaudimengabeziak eragindako konkurtso-prozesuen kopuruak % 2 egin du gora, eta 3.749 izan dira guztira. Horregatik, ez da harritzekoa enpresa asko, batez ere ETEak, kezkati egotea beren kreditu komertzialak kobratuko ote dituzten.
Ziurgabetasun hori konpontzeko sortu zen factoringa. Oso finantzaketa-tresna erabilgarria da berehalako likidezia behar duten enpresentzat, komisio baten trukean kobratzeko dituzten kreditu komertzialekin ustekaberik izan ez dezaten.
Factoringean hiru protagonista daude: lehenak, enpresak, kreditu komertziala sortu eta factoring-zerbitzua kontratatzen du; bigarrenak, bezeroak, kreditu komertziala zor dio enpresari; eta hirugarrenak, finantza-erakundeak, eragiketa burutzen du.
Ohiko factoring-zerbitzuan, gure enpresak finantza-erakundeari lagatzen dizkio bezeroei emandako epe laburrerako kreditu komertzialak, hau da, kobratzeko dituen fakturak. Lagapen horren trukean, finantza-erakundeak faktura horien zenbatekoa aurreratzen digu automatikoki, interes eta komisioei dagokien ehuneko bat kenduta. Horrela, gure enpresak kobratzeko dituen fakturen zenbatekoa berehala jasotzea bermatzen du, eta finantza-erakundea arduratzen da horiek kobratzeaz, komisio baten trukean.
Baina berehalako likidezia lortzea ez da abantaila bakarra. Tresna horrek kontabilizatutako fakturen kontrola hobetzeko eta, errekurtsorik gabeko factoringaren kasuan, kaudimengabezia-arriskua baztertzeko aukera ematen die enpresei. Horrela, eman diogun zerbitzua ordaintzeko dirurik ez badu bezeroak, finantza-erakundeak hartuko du ez-ordaintzea bere gain eta kudeatuko du.
Gainera, enpresaren zirkulatzailea hobetzen du, faktorizatutako bezeroen partidak balantzetik ken daitezkeelako.
Beraz, factoringari esker, gure zereginean lasai jardun dezakegu, kobratzeko ditugun fakturen gestioaz eta hazten jarraitzeko adinako likidezia izango dugun jakiteaz kezkatu gabe.
Factoring-motak
Baina egoera guztiak eta enpresa guztien beharrak ez dira berdinak. Horregatik, bi factoring-mota daude:
- Errekurtsorik gabeko factoringa. Formula horren bidez, enpresek ez dute batere erantzukizunik hartzen kobratzeko dagoen fakturaren gestioaz. Horrela, zordunak ezin badie aurre egin factoring-eragiketan egin eta onartutako fakturei, finantza-erakundeak bereganatuko ditu galerak, eta dirua berreskuratzen saiatzeko behar diren izapideak jarriko ditu martxan. Labur esanda: erakundeak bereganatzen du zordunaren kaudimengabezia-arriskua.
- Factoring errekurtsoduna. Kasu horretan, erakundea arduratzen da fakturen zenbatekoa aurreratu eta zordunengandik kobrantza gestionatzeaz. Halere, bezeroak ordaintzen ez badu, finantza-erakundeak ez du zorraren zenbatekoa bere gain hartuko, enpresa hartzekodunak baizik.
Norentzat da tresna hau? Txeke eta transferentzia bidez kobratzen duten sektore pribatuko enpresentzat bereziki egokia da factoringa. Gainera, arriskua kentzen die diru-sarrerak bezero-kopuru mugatu batetik eskuratzen dituzten enpresei. Eta, azkenik, ratio batzuk hobetzen (balantzea, likidezia, kaudimena eta altxortegia) laguntzen die enpresei.
Gogoan izan Laboral Kutxak eskura jartzen dizula zure enpresaren ordainketa eta kobrantzei buruz behar duzun informazio guztia eta Gaztenpresak zure negozioa sendotzen laguntzen dizula.
