y luego Añadir a pantalla de inicio.
Funtzio komertziala garrantzitsuenetako bat da bere negozioa martxan jarri berri duen edozein ekintzailerentzat. Zure bezero potentzialak erakartzeko eta zure zerbitzua edo produktua saltzeko unea da; horretarako, bisita komertzial bat hitzartzen duzu zure bezeroarekin; merkataritza-negoziaziorako teknika onenak erakusten dizkiozu… eta bingo!: aurrekontu bat eskatzen dizu.
Garrantzitsuena egin duzu jadanik, baina ezin duzu guardia jaitsi: aurrekontu bat egiteak ez du izapide hutsal bat izan behar, ezta pentsatu ere. Bezero potentzial baten aurrean zure lehen aurkezpen-gutuna izango den dokumentua prestatu behar duzu. Salmenta ixteko xehetasun guztiak zaindu behar dituzu, zure bezeroa pozik gera dadin eta, batez ere, etorkizunean berriz kontrata zaitzan.
Ez duzu egin beharreko lanek izango duten kostuaren kuantifikazio hutsal bat balitz bezala hartu behar: gogoratu zure bezero potentzial askok zuk prestatu diezun aurrekontua aztertu ondoren hartuko dutela zu kontratatzeko erabakia. Eta garrantzitsuena beti prezioa dela uste baduzu ere, hori ez da beti horrela izaten: askok aurrekontu pertsonalizatua, argia, xehatua eta bisualki garbia eta erakargarria ikusi nahi izaten dute.
Aurrekontu egoki batek honako elementu hauek hartu behar ditu barne:
- Enpresaren edo autonomoaren datuak. Dokumentuaren goiburuan zure enpresaren edo zure informazio fiskala adierazi behar da, hau da, zure izen-abizenak, helbidea eta IFZ edo IFK.
- Bezeroaren datuak. Aurrekontu guztiek pertsonalizatuta egon behar dute eta, horregatik, oso garrantzitsua da, gure datuez gain, bezeroaren datuak gaineratzea.
- Azken kostua. Aurrekontu bat jasotzean edozein bezerok bilatzen duen lehenengo gauza azken prezioa da. Saihestezina da. Horregatik, argi eta garbi adierazi behar duzu, BEZ barne, erraz identifikatzeko gai izan dadin.
- Xehakapena eta deskribapen osoa. Zure lanaren esparru guztietan aplikatu behar duzu ordena eta, horretarako, partida guztiek xehakatuta egon behar dute aurrekontuan, bakoitzaren deskribapen-oharrak eta azalpenak eta kasuan kasuko prezio xehatuak adieraziz, BEZari dagokion zenbatekoa barne.
- Aurrekontuaren baldintzen data eta iraupena. Aurrekontuek ez dute betirako balio: zerbitzuen eta materialen prezioak aldatu egin daitezke urte batetik bestera, eta zuhur jokatu behar duzu. Gerta liteke bezero batek aurrekontua eskatzea, denbora-tarte luze batean aurrekontuaz ahaztea eta, berriz hartzean, hasiera batean eskainitako prezioa manten diezaiozula eskatzea. Horrelakoetan, zure esku dago lana prezio horretan emateak merezi dizun edo eguneratu egin nahi duzun erabakitzea; edonola ere, interesgarria da dokumentuan argi eta garbi adieraztea hasiera batean eskaini dizkiozun prezioek eta baldintzek zenbateko indarraldia izango duten.
- Ordaintzeko modua. Bezeroari ordainketa-prozesua errazteko, adieraz iezaiozu aurrekontuan bertan nola egin behar duen. Erosoa izan behar du bezeroarentzat eta, ahal izanez gero, ziurta zaitez zuk ere denbora eta modu egokian kobratzen duzula. Zenbat eta garbiago utzi gauza horiek guztiak, askoz hobeto denontzat.
- Kalitatearen bermea. Oso garrantzitsua da zure lanaren kalitatea, zure konfidentzialtasuna edo zure produktuaren funtzionalitatea bermatzea. Bermeak konfiantza eta segurtasuna ematen ditu eta, askotan, hori izan daiteke balantza zure alde inklinatuko duen pisua.
- Epeak eta aseguruak. Zerbitzuen eskaintza guztiek horiek gauzatzeko epe bat izan behar dute, eta hark behar bezala zehaztuta egon behar du. Erantzukizun zibileko aseguruei dagokienez, enpresa batzuek horrelako bat izan behar dute lan bat egiten duten bitartean gerta daitezkeen gorabeherei aurre egiteko.
Dagoeneko ezagutzen dituzu aurrekontuan sartu beharreko elementu guztiak, baina gerta liteke hura prestatzeko tresna bat behar izatea. Beti jo dezakezu Word dokumentu edo Excel orri batera, baina badira prozesuan lagun diezazuketen beste erreminta batzuk ere.
- Prolance. App hori iOS sisteman bakarrik erabil daiteke, eta eskaini behar duten zerbitzuaren truke beren bezeroei zenbat kobratu behar dieten argi ez duten freelancer guztientzat diseinatutako erreminta da. Proiektua, hura gauzatzeko beharrezko orduak, esperientzia eta abar hartzen dira kontuan.
- Quotebase. Aplikazio horren bitartez, aurrekontuak PDF formatuan sortu ahal izateaz gain, sarean lan egin ahal izango duzu lantalde bateko kideekin, eta aurrekontuak sortu ahal izango dituzu beste profesional batzuekin.
- Cuentica. Kudeaketa-programa hori besteak baino zabalagoa da eta, haren bitartez, fakturak eta aurrekontuak sortu, gastuak jaso, bezero eta hornitzaileen datu-baseak sortu eta fakturak posta elektronikoz bidali ahal izango dituzu, besteak beste.
Orain, aurrekontu egoki bat egiteko behar duzun guztia duzu. Honako bi elementu hauek bakarrik izan behar dituzu gogoan:
- Deskontuen kudeaketa. Zure negozioak deskontuak egiteko formula onartzen badu, izan ezazu kontuan, zure produktuari edo zerbitzuari eskaintza horiek aplikatzeak zure bezeroaren pertzepzioa hobetu baitezake.
- Jantzi ondo zure aurrekontua. Fakturen kasuan ez bezala, dokumentu hauek ez dute modu korrelatiboan zenbatuta egon behar, baina aurrekontu-zenbaki bat jartzeak dinamismo- eta mugimendu-irudia ematen dio enpresari.
Ekintzailetzarekin lotutako edozein zalantzarekin laguntza behar baduzu, zure Laboral Kutxa bulegoan eta Gaztenpresaren web-orrian aurkituko gaituzu. Baita sareetan ere: Facebooken, Twitterren eta Linkedinen. Zain izango gaituzu!
