y luego Añadir a pantalla de inicio.
Gizonentzako neurrirako joskintzako eta jantzigintzako marka da Jajoan, hainbat saltoki ditu estatu osoan, eta Bilbokoa dago haien artean. Noelia Fernándezek gidatzen du saltoki hau, eta gaur harekin hitz egingo dugu ekintzailetzari lotuta duen historia ezagutzeko.
Nola hasi zen zure abentura ekintzailea?
Jajoan markak zenbait urte zeramatzan jada Bilbon zeukan dendarekin eta dendako langileetako bat nintzen ni. Baina duela urte pare bat, establezimenduaren ardura nire gain hartzeko aukera zabaldu zitzaidan eta horixe egin nuen.
Prozesuaren zein unetan jarri zinen harremanetan Gaztenpresarekin?
Nire kasuan lagun batzuek hitz egin zidaten zuen erakundeari buruz. Ekintzailetzan sartzera animatu behar nintzela aipatu nien eta haietakoren batek zuekin hitz egiteko esan zidan. Pertsona horrek zuekin esperientzia positibo bat izan zuela suposatu nuen, zuengana jotzeko gomendatu baitzidan, eta kasu egin nion.
Eta nola lagundu dizu Gaztenpresak?
Gauza askotan lagundu dit, bideragarria izaten jarraitzen zuen saltoki bat zela baliozkotzeko negozio-plana egitearekin hasi eta finantzaketa-iturriak lortzearekin bukatu, eskatu behar nuen maileguarekin zein lortzen lagundu zidaten autoenplegurako dirulaguntza batekin. Egia esan, zuen erakundeak negozioa nire kargura hartzeko eman behar izan ditudan pauso guztietan lagundu eta babestu nauela sentitu dut. Gainera, badakit hor jarraitzen duzuela eta zuengana joko dut inolako zalantzarik gabe edozein arazo sortzen bazait.
Zer aldaketa nabaritu duzu enplegatu bat izateari utzi eta Bilboko Jajoan dendaren buru den pertsona bihurtzean?
Negozioaren jarduerari dagokionez, hau da, jostundegia, ez dut aldaketa handirik nabaritu, izan ere saltokiaren egunerokoan ni nintzelako negozioaz arduratzen zen pertsona. Baina, jakina, badira gauza batzuk lehen nire ardurapekoak ez zirenak eta orain arduradun gorena naiz, horrek dakarren guztiarekin. Erosketak egiten ditut, erabakiak hartzen ditut eta arrisku guztiak ere nik hartzen ditut.
Lekuz aldatzea izan da hartu duzun erabaki horietako bat. Zerk eraman zaitu aldaketa hori egitera?
Juan Ajuriagerra kalean zegoen lehen denda eta uste dut kokapen horretan agerikotasuna falta zitzaigula. Hirigunetik gertuago kokatutako leku bat behar zuen negozioak eta, batez ere, komertzialagoa eta, horregatik, Astarloa kalera etortzea erabaki nuen, Ledesma kalearen kantoian.
Urtebete baino gehiago daramazu jada negozioaren buruan. Kontatuko zeniguke nola doakizun orain arte?
Esperientzia oso ona izan da. Pandemia eta gero eta edozein motatako ekitaldiak bertan behera utzi dituen bi urteko tartearen ondoren, joskintzaren eta zeremoniako trajeen gorakada bat ekarri du normaltasunaren itzulerak. Oso pozik nago halaber kokapen-aldaketarekin. Guztiz asmatu dugula uste dut eta ondorio positiboa izan du negozioan.
Milesker zure historia gurekin partekatzeagatik, Noelia! Hemen dituzue bere saltokiaren harremanetarako datuak, bisitatu nahi baduzue edo sare sozialetan jarraitu nahi baduzue.
Jajoan jostundegia
Astarloa, 5 (Ledesma kalearen kantoian). 48001 Bilbo.
Tel. +944 36 18 97
e-mail: gestionayudas@eve.eus
Instagram: @sastreriajajoanbilbao
