Bidelaguna: Gipuzkoako Foru Aldundiaren laguntzak enpresa berriak sortzeko

Gipuzkoako Foru Aldundiaren Bidelaguna programaren barruan, mikroenpresak sortzeko laguntzei buruzko atala eskaini zaie ekintzaileei.

Artikulu honetan gogorarazi nahi dizuegu, Gipuzkoan ekintzaile bazarete, Gipuzkoako Foru Aldundiak laguntzak jarri dituela zuen esku  enpresa berriak sortzeko, dagoeneko abian direnetan lehiakortasuna eta berrikuntza hobetzeko, eta abar. Gaztenpresako lan-taldeak pozik lagunduko dizue, eta gai horren inguruan dituzuen zalantza guztiak argituko dizkizue.

Gipuzkoan mikroenpresak sortzeko Bidelaguna programak eskaintzen dituen laguntzak izango ditugu hizpide gaur:

Mikroenpresa sortu nahi duten ekintzaileentzako laguntzen helburua:

Enpresa sortu eta garatzeko prozesuan laguntzea; horretarako, abian jartzeko eta sendotzeko fase kritikoetan mikroenpresak sendotzeko eta modernizatzeko proiektuak lantzea sustatuko da (lehenengo 2 eta 5 urteen artean).

Diru-laguntzen onuradunak:

Sortu berri diren mikroenpresak, honako baldintza hauek betetzen dituztenak:

• Helbide soziala eta fiskala Gipuzkoan duen enpresa izatea
• 2009ko urtarrilaren 1etik aurrera sortutako enpresa izatea (data horren ondoren eratu eta ekonomia-jardueren gaineko zergan izena eman duena)

Diruz lagun daitezkeen ekintzak

Aholkularitza-gastuak eta hirugarren erakundeek eskainitako kanpoko lanei dagozkienak, betiere enpresak hobetzera eta lehiakorrago egitera bideratu direnak (kudeaketa aurreratuko sistemak ezartzea izan ezik: kudeabide).

Merkatu-azterketak sakontzea eta garatzea.

• Aldez aurreko diagnostikoak eta azterketak egiteko kanpoko zerbitzuak. Azterketon xedea berrikuntzako eta/edo lehiakortasuna hobetzeko proiektuak antzematea edo abian jartzea izango da: jarduera-ildo berriak, merkatuak eta merkaturatzeko estrategia berriak; baita horiek abian jartzea ere.
• Kudeaketa-sistemak ezartzeko eta/edo ziurtagiria eskuratzeko kanpoko zerbitzuak.
• Finantza-azterketak egiteko kanpoko zerbitzuak (enpresaren azterketa ekonomikoa eta finantzarioa: azterketa eta gomendioak).
• Kudeaketa-sistemei buruzko azterketak egiteko kanpoko zerbitzuak (enpresaren kudeaketa-sistemen azterketa: azterketa eta gomendioak).
• Adimen teknologikoko eta lehiakorreko zerbitzuak.

Gutxienez 2.500 €-ko kostu hautagarria duten proiektuak

Kanpoko aholkularitzako gastuak ez dira jarduera iraunkorrei edo aldizkakoei dagozkienak izango, eta ez dira enpresaren ohiko ustiaketa-gastuekin lotuta egongo, zerga-aholkularitzako ohiko zerbitzuak, aldizkako zerbitzu juridikoak edo publizitatekoak, kasu. IKTen garapenarekin eta ezarpenekin lotuta dauden zerbitzuak ere ildo horretakoak dira.

Zenbatekoa

Kostu hautagarriaren % 60rainokoa, eta beste % 5 gehiago proiektua emakumeek sustatu badute edo jardueraren esparrua ekonomia berdea edo zuria deritzotenak badira.

Gehienez 4.000 euro erakunde eskatzaile bakoitzeko (4.400 € emakumeek sustatutako proiektuen edo ekonomia berdekoen/zurikoen kasuan).

Gehienez:  proiektu bat enpresa bakoitzeko.

Gipuzkoako mikroenpresentzako laguntzei buruzko informazio gehiago: Bidelaguna edo Gaztenpresa webguneetan.