y luego Añadir a pantalla de inicio.
Osasun-arloko aplikazioak, zerbitzu publikoen prototipoak, bizikletak, agentzia digitalak… Mota guztietako ideiak eta ekintzailetza, bete-betean. Hori da, hain zuzen ere, egun hauetan Euskalduna Jauregiko 3. pabiloia bete duten standetan ikusi ahal izan duguna, bi egunetan zehar, Espainia iparraldeko startup enpresentzako inbertsio-fororik garrantzitsuena gauzatu baita bertan: 2016ko B Venture.
Gaztenpresa Fundazioak ere parte hartu nahi izan du ekitaldi horretan, nola ez. Izan ere, bertaratutako jendetzaren aldetik sekulako arrakasta izan du, eta finantziazioa eta kapital-bilaketa izan ditu ardatz. Eta Gaztenpresan esateko asko dugu abiapuntuko gai horren inguruan.
4.000 enpresa baino gehiago martxan jartzen lagundu ostean, gure proposamenak hobetzen jarraitu eta aurrerapauso bat eman nahi dugu guganako konfiantza agertzen duten bezeroei eskaintzen diegun laguntzari dagokionez. Horregatik, foroak iraun duen bi egunetan zehar, gure standetik igaro direnei aholkularitza eskaintzeaz gain, ekintzaileen premiak eta kezkak entzun ditugu.
Joan-etorriko komunikazio-prozesu horrek izugarri aberastu du B Venture ekitaldian bizitutako esperientzia, eta hori argi eta garbi ikusi ahal izan da antolakuntzak prestatu dituen eta guk modu aktiboan parte hartu dugun tailerretan. 48 ordu horietan zehar etenik gabe hitz egin dugu lehen urratsak nola eman, erabaki egokiak nola hartu eta ideiak errealitate bihurtzeko beharrezko laguntza nola lortu.
Gainera, startup bakoitzak agertokira igotzeko aukera izan du, bere proiektuak aurkeztera eta bere picht-a egitera –horrela deitzen zaie ekintzaileek balizko inbertitzaileei konbentzitzeko prestatzen dituzten aurkezpenei–. Horri guztiari esker, Bilbon antolatutako hitzordua aukera paregabea izan da networking-a egin eta beren negozioa sustatu nahi izan duten guztientzat.
Oscar Muguerza, finantziazioari buruz: “Ez dira alderdi negatiboak ezkutatu behar”
Zentzu horretan, finantziazio-bilaketa izan da, inolako zalantzarik gabe, gai nagusia. Proiektu bat abian jartzeko orduan ondo lotuta utzi behar da dena: negozio-ideia ondo landu, enpresa-plan egokia prestatu, ingurukoen laguntza jaso… mila gauza. Baina, benetan, oso zaila da proiektu bat beharrezko inbertsiorik gabe aurrera ateratzea, batez ere hura nola bilatu ez dakizunean.
Horren inguruan, hau da, babes ekonomikoa bilatzean hartzen diren erabaki zuzen eta okerren inguruan, hitz egin zuten mahai-inguru batean. Bertan, Oscar Muguerzak, Laboral Kutxako Enpresen Negozio Garapeneko zuzendariak, hainbat business angels eta ekintzailerekin batera parte hartu zuen, hala nola, Big Sur Venture Partners-en fundatzaile José Miguel Herrerorekin eta VitaminaK edo coches.com enpresen fundatzaile Iñaki Arriolarekin.
Horiek guztiek bat egin zuten proiektu bat aurkezteko orduan gardena izatea oso garrantzitsua dela esatean. Muguerzaren ustez, “akats garrantzitsuenetako bat informazioa ezkutatzea da, KPI negatiboak, adibidez”. Laboral Kutxako ordezkariaren ustez, arrakasta izateko ezinbestekoa da “arrautza guztiak saski berean ez jartzea eta dibertsifikatzen saiatzea, hori baita arriskuak murrizteko gakoetako bat”.
