y luego Añadir a pantalla de inicio.
Bizitzako egoera batzuetan aukera bakarra duzu. Ezin duzu aukera alferrik galdu. Zure enpresa denbora gutxian “saltzen” jakitea da horietako bat. Gai izango zinateke 3 minutuan balizko inbertitzaile bat konbentzitzeko?
Zuzena, zehatza eta elokuentea izatea eta pasioa eta fidagarritasuna transmititzea. Baina hori guztia igogailuko elkarrizketa baten denboran egin behar da. Horretan datza, funtsean, elevator pitch delakoa (anglizismo horrek proiektu bat denbora gutxian aurkezteko hitzalditxoa edo mikroaurkezpena definitzen du). Gure gizartea berehalakotasunean bizi da. Segundoak inoiz baino garrantzitsuagoak dira.
Beraz, negozio bati ekin badiozu edo ekitea buruan baduzu, jakingo duzu zein garrantzitsua den, besteak beste, finantzaketa lortzea. Eta inoiz ez dakizu noiz eta non aurkituko duzun balizko inbertitzaile bat, metroan, supermerkatuko ilaran, hitzaldi batean, aurkezpen batean edo igogailuan. Horregatik, hobe da hizketaldia prest izatea, zure solaskidearen arreta erakartzeko, eta nork daki…
Hona hemen mikroaurkezpen arrakastatsua prestatzeko aholku batzuk:
- Funtsezkoa da produktuaren deskribapen egokia. Ezer baino lehen, argi geratu behar da zertaz ari garen. Egizu proba ezagun, senide eta lagunekin. 30 segundoan baino gutxiagoan zure negozioaren nondik norakoak ulertarazteko gai izan behar duzu. Hori ezinbestekoa da solaskidea “lotzeko”. Oso erabilgarriak dira honelako konparazioak: “Gu … arloaren Facebook gara” edo “Gu … arloaren Spotify gara”.
- Arazo bat, irtenbide bat. Hurrengo urratsa zure produktua edo zerbitzua arazo bat konpontzeko sortu dela frogatzea da (edo arazo baten sorrerari aurrea hartu diozula eta dagoeneko konponbidea duzula J). Gogoan izan zer esan genuen negozio-ideia bat identifikatzeko gakoei buruzko postean.
- Bezeroa eta sarreren sorrera. Zure produktua eta nola konponduko dituzun arazoak asko gustatu arren, hori erosteko jende pilo bat dirua gastatzen ikusten ez badute (ondo zehaztu behar duzu zer jende den hori, bezero potentziala), nekez inbertituko dute zure negozioan. Azkenean, gustatu ala ez, merkatua diruaren arabera mugitzen da ia beti. Baina zure proiektua aberastasun-iturria da, ezta?
- Lehiakideen aurretik. Egungo merkatuaren beste ezaugarrietako bat lehia izugarria da. Deskribatu zure lehiakideak, utzi argi zergatik zaren haiek baino hobea eta zergatik zoazen haiek baino pauso bat aurrerago. Horri aurreikuspena eta estrategia deitzen zaio, eta inbertitzaileek asko preziatzen dute.
- Datuak eta ziurgabetasun pixka bat. Ikasi buruz zure jarduerari lotutako datu garrantzitsu batzuk, aurreikuspenak, historikoak… Horrela emango duzu oso ondo dakizula zertaz ari zaren eta pertsona analitikoa zarela. Baina gorde beti zerbait ezkutuan. Hau da, sortu igurikimen handiak zutaz eta zure negozioaz, baina utzi ate bat zabalik haiek zuri deitzea erabaki dezaten (eraman beti bisita-txartelak, baina ez banatu handik eta hemendik itsu-itsuan). Ezaguna egiten al zaizu? Bai; azken batean, gizon eta emakumeen arteko limurketa bezalakoa da, sedukzio hutsa.
- Naturaltasuna, giro ona eta aurrejoera. Negozioaren inguruko diskurtsoaz gain, ez dugu ahaztu behar zu ere, pertsona bezala, pack horren osagai bat zarela. Joka ezazu naturaltasunez eta lasaitasunez, egin irribarre, eman irudi ona eta erakutsi ez dizula axola edozer galderari erantzuteak, zure posibilitateekiko konfiantza osoa duzulako eta jokoan diren aldagai guztiak ezin hobeto ezagutzen dituzulako.
Hori guztia egitea lortzen baduzu, zure mikroaurkezpena prest egongo da eguneroko merkatu lehiakorrean bere lekua hartzeko. Nork daki non aurkituko duzun zeure aukera…
