y luego Añadir a pantalla de inicio.
Interneten egon behar duzu. Zure negozioa dena dela, online presentzia izatea komeni zaizu. Ados, eta zer egin behar dut? Zein urrats jarraitu behar ditut? Egia esan, uste duzuna baino sinpleagoa eta merkeagoa da. Jarraian azalduko dizugu.
Lehenik eta behin, Interneteko domeinuaren izena erregistratu behar duzu. Hau da, jendeak sarean aurkitzea nahi duzun izena aukeratu behar duzu (asko sinplifikatuta, Interneteko zure web-orriaren izena). Dagoeneko offline negozio bat baduzu, izen bera erabiltzea da ohikoena, eta bestela, zure enpresarentzat aukeratu duzun izena.
Beste aukera bat zure jarduera deskribatzen duen izen bat aukeratzea da (peluqueríavitoria.com, zapatosrekalde.eus edo talleresamara.net, adibidez), baina mota horretako domeinuek eskaera handiagoa izaten dute, eta lortzeko zailagoak eta garestiagoak izaten dira. Domeinuaren luzapenari dagokionez, zure helburuen eta lehentasunen arabera egin beharko duzu aukeraketa. Domeinuak izango duen izena aukeratzea oso garrantzitsua da, eta arretatsua izan behar duzu zentzu horretan.
Egiaztatu erabilgarritasuna baimendutako erregistroetan
Bi kasuetan, eta aurrera jarraitu aurretik, zure web-orriarentzat aukeratu duzun izena erabilgarri dagoela egiaztatu behar duzu. Eta nola egin hori? Oso sinplea da. Baimendutako domeinuen erregistratzaile baten web-orrian sartu behar duzu, besterik gabe.
Eta zenbat kostatuko zait? Norbaitek doako aukerak daudela esango dizu seguruenik, baina ezer kostatzen ez den guztiak bezala, horrek ere badu letra txikia. Egia da badirela web-orriak doan sortzeko aukera eskaintzen duten plataformak, Blogger eta WordPress, esaterako, baina horiek muga garrantzitsuak izaten dituzte online ikusgaitasunari eta pertsonalizazioari dagokionez, besteak beste. Horien bitartez azpi-domeinuak lortzen dira, .blogspot.com lehenengoaren kasuan eta .wordpress.com bigarrenaren kasuan.
Hori dela-eta, ordaindu egin behar den aukera bat hautatu eta norbere domeinua izatea gomendatzen da. Interesgarriak iruditzen zaizkizun domeinuen erabilgarritasuna egiaztatzeko prozesuan, prezioak dezente aldatzen direla ikusiko duzu.
Prezio aldakorrak
Zergatik? ICANN (Izen eta Zenbakien Esleipenerako Interneteko Korporazioa) korporazioak edo harekin lotutako erakundeek domeinuen oinarrizko prezio bat finkatzen dute, baina gainerako guztia erregistratzaile bakoitzak zehazten du, erregistroaren gestio-gastuak eta harekin lotutako mantentze-gastuak kontuan hartuta. Azken finean, domeinuak duen luzapenaren eta gestioa egiteko erabili duzun plataformaren arabera zenbait prezio ikusiko dituzu. Baina urtean gehienez ere 15 euro kostatzea da ohikoena.
Laburbilduz:
- Izena aukeratzea (duela urte-pare batetik, askoz amaiera-aukera gehiago dituzu, hala nola, Euskadiko .eus).
- Erabilgarritasuna egiaztatzea
- Erregistro-prozesua
Azken urrats hori aldatu egiten da aukeratutako erregistratzailearen arabera, baina zure datu pertsonalak ezinbestean eman beharko dituzu. Domeinua zuk gestionatu behar baduzu, haren jabea zu izatea gomendatzen da.
Pribatutasunaren garrantzia
Zure datu pertsonalak babestu nahi badituzu, oso interesgarria da zertxobait gehiago ordaindu eta Whois pribatu bat kontratatzea (urtean 3 euro gehiago izango dira gehienez ere). Horrela, zure datuetara ez da beste inor sartuko edo horiek ez dira interesatzen ez zaizkizun beste helburu batzuetarako erabiliko, spam edo telemarketin gisa, esaterako.
Erregistro-prozesua hura ordaintzean amaituko da. Hori egin ostean denbora pixka bat itxaron beharko duzu, 4 eta 48 ordu artean, domeinua Interneteko zerbitzari guztietan onartu dadin. Denbora-tarte hori igaro ostean, domeinua erregistratu dela jakinaraziko zaizu, eta mundu guztia sartu ahal izango da bertan. Gogoratu adi egon beharko duzula Interneteko zure domeinua berritzeko.
Ez da horren zaila izan, ezta? Orain digitala zara dagoeneko, eta garai berrietara egokitu zara. Horrenbestez, Innova Bilbao 2016 jarraituko zenuen seguruenik. Eta hala egin ahal izan ez baduzu, laster txostengile esanguratsuenetako batekin egindako elkarrizketa esklusiboa argitaratuko dugula aurreratzen dizugu. Jarraitu gure bloga eta sare sozialak, eta ez ezazu galdu!
