y luego Añadir a pantalla de inicio.
“Orain arte elkarrekin egon ez diren bi gauza elkartzen dituzu. Eta mundua aldatu egiten da. Jendea ez da berehala ohartuko agian, baina ez dio axola. Mundua aldatu egin da, halere.” Horrela hasten da Julian Barnesen Niveles de vida izeneko nobela. Eta horixe gertatu da Gasteizen, Marta Martinez eta Amaia Etxebarria elkartu direnean: zerbait aldatu da, eta Mara-Mara Liburuak jaio da. Liburu-denda txiki bat da, eta San Frantzisko kaleko 16. zenbakian dago kokatua.
Martak eta Amaiak hainbat urtetako esperientzia zuten liburugintzan, kate handi batean lan egin baitzuten. Halere, “liburu-etxe” propioa sortzeko ametsa zuten, eta Gaztenpresara jo zuten, proiektuaren berri emateko. Fundazioaren aholkularitzari esker –negozio-ideiarekin lagundu zien–, konturatu ziren asmoa ez zela horren zentzugabea, eta lanari ekin zioten. Liburu-denda zabalik dago 2014ko abenduaz geroztik, eta denbora gutxian, erreferente bihurtu da literatura onaren zaleentzat.
Honelakoa da Mara-Mara
Sartu bezain laster, ongietorria ematen digu Noemí Villamuza ilustratzailearen horma-irudi batek. Noemí Ilustrazio Sari Nazionaleko finalista izan zen, eta haurrentzako ilustrazio-lantegi bat eman du Mara-Maran. Izan ere, Mara-Marak, liburu-denda ez ezik, elkargune bat ere izan nahi du, ikastaro, jarduera, aurkezpen eta horrelako ekitaldien bidez. Gainera, ohikoa da idazleren bat ezkutuan aurkitzea, liburuak begiratzen ari dela, irakurle arrunt bat izango balitz bezala.
Mara-Mara Kultur-Gasteiz elkarteko kidea da. Arabako hiriburuko bizitza dinamizatzeko helburua du elkarte horrek. Ekintzaile horiek elkartearen webgunean diotenez, beti ikusi dute horrelako espazioen gabezia hirian: “Guk esperientzia luzea dugu liburuaren arloan, eta tratu hurbilagoa eta pertsonalagoa bilatzen dugu bezeroarekin, aholkularitza hobea, leku eta giro lasai batean, liburuak presarik gabe begiratu, kafe bat hartu eta etxean bezala sentitzeko”.
Mara-Maran benetako bitxiak aurki daitezke; esate baterako, Mark Twainen “Los diarios de Adán y Eva” liburuaren edizio berria, Sara Morantek ilustratua; edo haurrentzako liburu ilustratuen bildumak, hain politak ezen heldu batek baino gehiagok ere eramango bailituzke etxera. Baita nobelen eta poesia-liburuen aukera zaindua ere.
Gonbidatzen zaitugu liburu-denda bisitatzera, eta, zuk ere zeure ideia martxan jartzea pentsatzen ari bazara, zatoz guregana. Aholku emango dizugu doan eta konpromisorik gabe. Zalantzaren bat kontsultatu edo iradokizunen bat egin nahi badiguzu, jarri gurekin harremanetan. Zuri laguntzeko gaude.
