y luego Añadir a pantalla de inicio.
Sheila Rubiarekin hitz egin dugu gaur. Emakume ekintzaile honek, Emilio Cabrera bikotekidearekin batera, etxeko sukaldaritzako negozio bat jarri du abian Iruñean, eramateko janariarekin. Bere establezimenduak “Pollos Asados La Abuela” du izena eta, elkarrizketa honetan, proiektu honen jatorria eta Gaztenpresak errealitate bihurtzen nola lagundu dion azalduko digu.
Nola sortu zen zuen negozioa abian jartzeko ideia?
Emilioren gurasoek 45 urte baino gehiago eman dituzte Jaenen oilaskoak erretzen, eta pentsatu genuen ideia ona izan zitekeela familiako tradizioarekin jarraitzea, baina Iruñean, gu bizi garen hirian. Gainera, gure auzoan, Artika Berrian, lokal bat “fitxatu” genuen, kokalekuagatik asko gustatzen zitzaiguna, eta, obretan zegoen arren eta egokitu beharra zegoen arren, azkenean hartu eta gure ideia errealitate bihurtzea erabaki genuen..
Zein unetan jarri zineten harremanetan Gaztenpresarekin?
Laboral Kutxara jo genuen, lokalaren obrarako finantzaketa behar genuelako, eta haiek bideratu gintuzten Gaztenpresara. Han ezagutu genuen Teresa, gure proiektuaz arduratu den aholkularia, eta une oro lagundu digu, behar izan dugun horretan lagunduz.
Guk oso argi geneukan proiektua; izan ere, esan dudan bezala, aita-amaginarrebek horretan jardun dute beren bizitzaren zati handi batean, eta bagenekien nola funtzionatzen duten horrelako negozioek. Ez genuen kontuan hartu lokalaren egokitzapenaren atzerapena. Zuk epe batzuk dituzu buruan, baina obrak luzatu egiten dira eta itxaropena galtzen duzu. Une horietan norbait behar duzu entzuteko, ulertzeko, animoak emateko… “Eskerrik asko beti hor egon zarelako” esan nion Teresari, azkenean negozioa irekitzea lortu genuenean.
Pollos Asados La Abuela-rengan jarriko dugu arreta. Zer eskaintzen duzue hemen?
Gure espezialitatea oilasko errea cortijera-saltsarekin da, Andaluziako sukaldaritzan ohikoa. Horretaz gain, eramateko beste plater batzuk ere baditugu, Jaengo sukaldaritza tradizionala eta Nafarroakoa uztartzen dituztenak, ni Leitzakoa bainaiz. Ez dugu karta luzerik, hemen saltzen dugun guztia -flamenkinak, kroketak, patatak, postreak eta abar- guk geuk egiten baitugu, mimo eta dedikazio handiz. Nahiago dugu kalitatea kantitatea baino, eta badirudi gure bezeroek gure erabakia bermatzen dutela, behin datorrenak beti errepikatzen duelako.
Orduan, pozik zaudete negozioak izan duen harrerarekin?
2022ko azaroan ireki genuen, eta ezin gusturago egon izan dugun harrerarekin. Espero genuena baino positiboagoa izan da. Izan ere, biok hemen lan egitea nahikoa zela uste genuen eta, azkenean, jendea kontratatu behar izan dugu. Zure ilusiotik bizi ahal izatea eta, gainera, enplegua sortzea oso pozgarria da.
Sheila eta Emilio, eskerrik asko zuen esperientzia ekintzailea partekatzeagatik!
POLLOS ASADOS LA ABUELA Maria Dominguez kalea, 15 – 2. beheko lokala (Artika Berria). 31013 Iruñea.Tel. 722 231 950
Facebook: Pollos Asados La Abuela. Instagram: @pollosasadoslaabuela
