y luego Añadir a pantalla de inicio.
Saltoki eta enpresa txikien erantzuna: ekintzaile-sena eta egokitzeko gaitasuna
Koronabirusaren hedapenak ekarritako osasun-larrialdiak ekintzailetzaren unibertso berri bat azalarazi du, egoera gainditze aldera euren burua berritzea erabaki duten pertsona ugarik osatzen dutena.
Krisiak gogor kolpatu ditu horietako asko, baina aurrerapausoa ematea eta euren onena eskaintzea erabaki dute, egungo egoerara egokitu eta aurrera egiteko. Batzuk sektorez aldatu dira jardunean jarraitzeko; beste batzuk konfinamendua entretenimenduz betetzen ari dira, eta beste askok osasun-sistemari zerbitzu ordainezina eskaintzen dihardute.
Horiek guztiak ekintzailetzari buruzko lezioa ematen ari dira egunero, baita, kasu askotan, elkartasunari buruzkoa ere. Gaztenpresatik, horiek agerian jartzen lagundu nahi dugu.
Nor dira eta zer ekimen jarri dituzte abian?
Osasun-larrialdiaren testuinguruan, ekintzaile-sarearen kemena eta egokitzeko gaitasuna nabarmentzeko kanpaina eramango dugu aurrera, egoerarik zailenean ere erakusten ari diren jarreraren garrantzia azpimarratzeko.
Inguruan ditugun kasu azpimarragarrienetako batzuk erakustea da gure helburua, lagungarri izan daitezen ekintzaile-sena erabili eta jardunean jarraitu dezagun. Kasuak Gaztenpresarekin lotutakoak izan daitezke edo ez.
Hala, ostalaritzako lokal txiki batzuek, jarduera aldi baterako itxi behar izan dutenean, negozioa etxez etxeko banaketara nola bideratu duten erakutsi nahi dugu. Era berean, hezkuntza-sektorean, tresna digitalei esker, ikaslez betetako gelak izan dituzten askok klaseak online eskaintzen dituzte, eta hori nola egin duten jakinarazi nahi dizugu. Jostundegi batek osasun-materiala josteko jarduerara jauzi egiteko zer behar izan duen kontatuko dizugu, eta beste hamaika adibide.
Haien lekukotzek lanerako bide berriak aurkitzen lagunduko dizutela espero dugu, bai estreinakoz ekintzaile izan nahi baduzu, eta bai zure negozioari bultzada eman eta sendotzeko asmoa baduzu, aurrera egiten jarraitzeko.
Beraz, datozen egunotan ez begirik kendu gure blogari eta sare sozialei —Facebook, Instagram, Twitter eta Linkedin—, eta jarduerarekin #JarraitzekoBerritzen jakin duten negozioen kasurik nabarmenenak ezagutuko dizugu.
