«Ilusioz, gogoz eta aholkularitza onez, dena lortzen da»

Pandemiak ere ezin du espiritu ekintzailea geldiarazi. Ia 20 urtez inoren kontura lanean aritu eta langabezian geratu ondoren, 3 emakume ekintzaile hauek lanari ekin eta beren proiektua aurrera ateratzea erabaki zuten. Euren buruarekiko, bezeroekiko eta merkatuari buruz zuten ezagutzarekiko konfiantzaren ondorioz, ideiak oso argi zituzten, eta jauzi egitera animatu ziren. Duela hilabete batzuk, ilusioz beteta, Magdalena Grandek, Jaione Camachok eta Marta Bodegasek euren zapata-, poltsa- eta osagarri-denda ireki zuten Donostian: Buleberri. Denda nola ireki zuten eta zer-nolako eragina izan duen kontatuko digute lehen eskutik.

GAZTENPRESA: Zergatik animatu zineten ekitera, beste aukerarik aztertu gabe?

BULEBERRI: «Lanean jarraitu behar genuen. Hutsetik hasteak nagikeria pixka bat ematen zigun; baina, egiten duguna izugarri gustuko dugunez, aurrera atera genezakeela pentsatu genuen. Urte asko izan dira mostradorearen atzean, eta esperientzia handia pilatu dugu. Tamalgarria izango zatekeen aukera alde batera uztea, saiatu gabe behintzat».

GZT: Nola sentitu zineten zuen negozioaren ateak lehen aldiz ireki zenituzten egunean?

BB: «Egia esan, sentsazio asko izan genituen, eta askotarikoak. Batetik, urduri geunden, ilusioz beteta eta pozik; baina, aldi berean, zalantza hori geneukan, gure egoera ez baitzen onena. Laburbilduz, pozarren eta edozertarako prest geunden. Beti jokatu izan dugu horrela, eta, orain, are gehiago».

GZT: Prozesu osoa esaldi bakarrean laburtu beharko bazenute, zein izango litzateke?

BB: «Hau litzateke esaldia: zaila bada ere, ilusioz, gogoz eta aholkularitza onez, dena lortzen da».

GZT: Nolakoak izaten ari dira lehen hilabeteak jendaurrean?

BB: «Lehen esan dugunez, urte asko daramatzagu jendearen aurrean lanean, gurekin jarraitzeko prest dauden bizitza osoko bezeroekin. Sinestezina da; mundu guztia dugu laguntzen eta animatzen».

GZT: Bide horretan Gaztenpresaren babesa izan duzue. Zertan lagundu dizue adituen laguntzak?

BB: «Egia esan, gauza guztietan. Aholkatu diguten pertsonei esker lortu ahal izan dugu gure proiektua aurrera ateratzea, eta, gainera, oso denbora laburrean. Bestela, ezinezkoa izango zatekeen. Oso esker oneko gaude. Guretzat, enpresa kudeatzen jakitea zen zailena. Inoiz ez dugu hori egin, eta oso argi geneukan aholkulari on bat bilatu behar genuela. Gaztenpresari eta Bultz-Lani esker ireki ahal izan ditugu gure negozioaren ateak».

GZT: Zer izan da pozgarriena prozesu honetan? Eta zerk sortu dizue zailtasunik gehien?

BB: «Dendan sartu eta zurea dela eta dena ahaleginari eta lanari esker lortu duzula pentsatzea sentsaziorik atseginenetako bat da; ezin duzu sinetsi».

«Eta zailena izapideen kontua izan da. Ikaragarria izan da; ez genekien nondik hasi. Baina aholkatu diguten pertsonei esker, askoz errazagoa izan da dena».

GZT: Zer aholku emango zeniokete proiektu batean hastear dagoen pertsona ekintzaile bati?

BB: «Aholkularitza profesional on bat bilatzea da gure aholkua, funtsezkoa baita. Dena bezala, hasieran zaila da; baina, proiektua martxan dagoenean, oso pozik sentitzen zara».