Laboral Kutxak eta Europako Inbertsio Fondoak 1.600 mikroenpresa abian jartzen eta 2.700 lanpostu sortzen lagunduko dute bi urtetan. Europako “Progress” programak Estatuan eman duen finantzaketa-lerro handiena da eta bigarrena Europa mailan.
Gaztenpresak proiektu horien tutoretzan hartuko du parte, ekintzaileari hasieratik amaierara lagunduta, zalantza eta oztopo guztiak gainditu eta ahalik eta negozio sendoenak erdieste aldera. Izan ere, duela 10 urte baino gehiago Laboral Kutxak, MCCk eta Eusko Jaurlaritzak sortutako Gaztenpresa Fundazioaren egitekoa funtsezkoa izan da Fondoak Laboral Kutxaren esku uzteko Finantzaketa-lerroa, enplegua sortzera eta sendotzera bideratuta dagoena.
Horrela, Gaztenpresak enpleguarekiko duen konpromisoa berretsi du, Laboral Kutxarekin batera. Aukera
gehiegi eskaintzen ez dituen lan-merkatuan enpresa-ekimena formula oso baliagarria da lan-munduan sartzeko, eta autogestioan oinarritutako irtenbidea eskaintzen du.
Gizarteratzea bokazio duen hitzarmenaren arabera, batez ere 36 urtetik beherako profesional autonomoak eta 10 langile arteko enpresa txikiak izango dira maileguen onuradun, betiere urtean 2.000.000 €-tik behera fakturatzen badute. Ohiko banku-finantzaketa eskuratzeko zailtasunak dituzten pertsona fisikoak edo juridikoak dira.
Maileguen ezaugarriei dagokienez, mikrofinantzaketaren ohiko estandarren ildoan, mailegu bakoitzeko gehienez 25.000 euroko zenbatekoa finkatu da, eta itzultzeko epea, berriz, 3 eta 60 hilabete artekoa izango da. Ekintzaileentzako finantzaketaren kasuan ez da berme osagarririk eskatuko, eta kanpoan geldituko dira, espresuki, higiezinak erostea edo berritzea eta birfinantzatzeak.
Bi erakundeek inbertsio arduratsuari dagozkion irizpideak onartu dituzte hitzarmenaren babespean finantzatuko diren negozioei dagokienez. Ondorioz, finantzaketa-lerrotik kanpo gelditzeko marra gorriak ezarri dira maileguen eskatzaileak armamentuarekin, giza klonazioarekin, tabakoarekin eta ausazko jokoekin lotutako jarduera lantzen duten kasuetarako.
Prezio-baldintzek abantaila bereziak dituzte: “Gaztenpresa baldintzak” ekintzaileentzat % 3,95eko interes-tasa finkoarekin, eta % 5,95ekoa gainontzeko kasuetarako.
LABORAL Kutxak, Gaztenpresa Fundazioaren bidez, ibilbidea luzea egina du enpresa-ekimena laguntzen. Berriki eman dira jakitera joan den 2013ko emaitzak: 458 zuzeneko lanpostu sortu ziren urtean eratutako 265 mikroenpresetan.
Ekin nahi baduzu edo orientazioa behar baduzu, Gaztenpresaren edo Laboral Kutxaren sukurtsalen batera hurbil zaitezke, pozik lagundu eta informatuko dizugu.
Informazio gehiago Laboral Kutxaren eta Europako Inbertsio Fondoaren arteko hitzarmenari buruz.
