- Lehiaketak hiru kategoria ditu MONDRAGON UNIBERTSITATEko ikasleentzat: Enpresa Ideia berriak, Landa Ingurunearen Garapena eta Pertsonen eguneroko bizitza errazteko proiektuak
- Iazko ediziotik, beste kategoria bat dago MONDRAGON UNIBERTSITATEAk presentzia duen Latinoamerikako unibertsitateetako proiektuentzat. Horiek Mexikon eta Kolonbian daude kokatuta
- Guztira MONDRAGON UNIBERTSITATEko 231 ikaslek eta Latinoamerikako unibertsitateetako 45 ikaslek hartu dute parte. MUkoek 68 proiektu aurkeztu dituzte eta latinoamerikarrek 14
- Kategoria bakoitzeko lehen sariak 1.000 euro jaso ditu, eta bigarren eta hirugarren sailkatuek, berriz, 500 euro, hurrenez hurren
‘Ekiten’ ekintzailetza-programako enpresa-proiektu onenen sariak banatu ditu gaur MONDRAGON UNIBERTSITATEAk. Lehiaketa urtez urte indartuz doa, eta ikasleengan ekintzailetzaren kultura txertatzea du helburu, baita ikasleek euren enpresak sortzea eta negozio berriak abian jartzea ere.
Aurtengo edizioan hiru kategoria antolatu dira: Enpresa Ideia Berriak (Gaztenpresak babestua); Landa Ingurunea Garatzeko Ideiak eta Proiektuak (Deba Goieneko eta Barreneko Landa Garapeneko agentziek babestua); eta Pertsonen Eguneroko Bizitza errazteko Ideia eta Zerbitzu Berritzaileak (Kimu Berrik babestua). Hiru kategoriak MONDRAGON UNIBERTSITATEko ikasleentzat dira. Horrez gain, iazko ediziotik beste kategoria bat dago: Latinoamerikako proiektuak. Mondragonen sareko unibertsitateetako ikasleentzat da kategoria hori, hau da, Mondragon Educación Internacionalen (MEI) barruan dauden Latinoamerikako unibertsitateentzat: UCO-Mondragon (Mexiko) eta Unipanamericana (Kolonbia).
Kategoria bakoitzeko talde irabazleak 1.000 euro eskuratu ditu, eta bigarren eta hirugarren sailkatuek, berriz, 500 euro talde bakoitzeko. Programako epaimahaiak proiektu bideragarrienak eta enplegu eta aberastasun gehien sortzeko gaitasuna dutenak aintzat hartu ditu irabazleak aukeratzean.
Guztira MONDRAGON UNIBERTSITATEko 231 ikaslek eta Latinoamerikako unibertsitateetako 45 ikaslek hartu dute parte. MUkoek 68 proiektu aurkeztu dituzte eta ikasle latinoamerikarrek 14. Guztira, beraz, 276 ikaslek hartu dute parte, eta 82 proiektu aurkeztu dituzte.
Clap shoes deritzon proiektuak irabazi du lehen saria, Enpresa Ideia Berrien kategorian; oinetako tradizionalak era iraunkor eta berritzaile batean egitea du xede proiektuak. Ortuz-ortu ekimenak, berriz, bigarren saria eskuratu du (lehenengoa eta hirugarrena hutsik geratu dira) Landa Garapenerako Ideia eta Proiektuen kategorian; ekimen horren bidez, nekazaritzako ekoizleak harremanetan jarriko lirateke seme-alabak landa-eremuaren balioetan hezi nahi dituzten gurasoekin. Azkenik, Three 2 one kanping denda proiektua izan da irabazlea Pertsonen eguneroko bizitza errazteko proiektuen kategorian: kanpaketa-kit bat da, kanpadenda, lo-zakua eta alfonbra pakete bakar batean eramatea ahalbidetzen duena.
Bestalde, MONDRAGON-UCO (Mexiko) Unibertsitateko Meatles proiektuak irabazi du MONDRAGON UNIBERTSITATEAk MEIren bidez parte hartzen duen Latinoamerikako unibertsitateetako proiektuetarako saria; elikagaien eta zerbitzuen industrian aukera osasungarriago bat eskainiko lukeen enpresa bat sortzea aurreikusten du proiektuak: barazkiz eta kimuz egindako hanburgesak eta bestelako elikagaiak eskainiko lizkieke bezeroei.
