y luego Añadir a pantalla de inicio.
Ekintzaileentzako laguntzak, horiek eskuratzeko modua. Informaziorik behar al duzu? Deitu Gaztenpresara, 900 101 143 telefonora.
Laguntzak. Enpresa- edo lanbide-abenturari ekiten dion ekintzaileak edo autonomoak horixe bilatzen du sarritan. Baina, finantzaketa edo laguntza eskatu aurretik, aztertu beharreko alderdi batzuk daude, deialdi jakin batera jotzeko aukera ote dugun eta komeni ote zaigun jakiteko. Bateragarria al da bestelako diru-laguntzaren batekin? Epe luzera arazorik sor al ditzake? Gida labur honetan hori guztia azaltzen saiatuko gara.
Langabezia-saria kapitalizatzea: bai ala ez?
Neurri lagungarrienetako bat langabezia-saria kapitalizatzea da. Aurreko post batean azaldu genuenez, langabezia-saria dena batera kobratzean datza, diru hori negozioa abian jartzeko inbertitze aldera. Era berean, diru hori autonomoen kuotak ordaintzeko ere erabil daiteke, edo bi aukerak konbina daitezke. Kapitalizazioa, Ogasunean jarduera ekonomikoetan izena eman aurretik eskatu behar da beti, langabezia-saria kobratzen ari garen bitartean. Printzipioz, eskatuko ditugun bestelako diru-laguntzekin bateragarria da.
Kontuz bateraezintasunekin
Laguntza-deialdiaren oinarrien arabera, eskatu nahi dugun laguntza hori jasotzen ari garen bestelako ordainekin bateragarria ote den ikusi beharko dugu. Izan ere, laguntza eskatzeko orduan kontuan izan behar dugun lehenetariko datua da hori.
Nola bilatu behar ditugu autonomoentzako diru-laguntzak eta bestelako laguntzak?
Laguntzak eta diru-laguntzak BOEn eta autonomia erkidegoetako aldizkari ofizialetan argitaratu ohi dituzte. Gogora dezagun BOEren Interneteko orrialdean, “A la carta” atalean, bilaketa pertsonalizatuak eta alertak sor ditzakegula, informazioa gure helbide elektronikora irits dadin eta interesgarriak zaizkigun azken argitalpenen berri izan dezagun. Aukera bera eskaintzen dute Foru Aldundietako aldizkari ofizialetako Interneteko orrialdeetan ere.
Era berean, aukera interesgarria da tokiko garapen-agentzietara eta ekintzaileei laguntzeko elkarteetara edo erakundeetara jotzea, Gaztenpresara, adibidez. Enpresen sorrera sustatzeko LABORAL Kutxaren gizarte-ekintzaren ekimena da Gaztenpresa, eta laguntza eskaintzen die ekintzaileei beren egitasmoaren fase guztietan, baita proiektua abian jartzeko eta sendotzeko laguntzen bilaketan ere.
Kontuan izan behar dugu…
Printzipioz, diru-laguntzek eta bestelakoek ez dutela inoiz gastu edo inbertsio osoa berdintzen, eta beraz, bestelako baliabideak ere erabili beharko ditugula. Gainera, diru-laguntza jakin bat eskatzeko eman beharko dugun denbora eta egin beharko ditugun izapideak ere hartu behar ditugu kontuan, izan ere, laguntzaren zenbatekoa txikia bada agian ez du mereziko hori guztia egitea.
Bestalde, agerikoa dirudien arren, diru-laguntza bat ezin liteke inoiz izan diru-sarrera nagusia gure negozio-planean edo hazkunde-aurreikuspenean. Halaber, kontuan izan behar dugu oinarriak urte batetik bestera alda daitezkeela, eta gerta litekeela laguntza hori guretzat eskuragarri ez izatea eskakizunak aldatu egin direlako. Edo guztia bide onetik joan arren, dagokigun diru-sarrera berandutu daiteke (batzuetan urtebete baino gehiagoz). Aintzat hartzekoa da ere diru-laguntzek zergetan izan dezaketen eragina.
Laburbilduz, diru-laguntzak gure negozioa laguntzeko modua dira eta kobratzen direnean bultzada garrantzitsua ematen dute, baina enpresa baten bideragarritasuna ez dago inoiz laguntzen menpe.
