Zure bezeroen komunikazioak diseinatzeko oinarrizko 5 tresna

Abuztua. Laster joango zara oporretan eta zure bezeroei jakinarazi behar diezu. Senak esaten dizu zure saltokiko erakusleihoan kartoi mehearen eta errotulagailuaren formula erabiliz edo sare sozialetan lerro soil batzuk idatziz ixte-daten berri ematea jada ez dela nahikoa. Horregatik, itxura oneko askotariko komunikazioak egiteko tresna batzuk erakutsiko dizkizugu. Horiek erabiltzeko ez duzu diseinu grafikoari buruzko ezagutzarik behar. Programa horiek ez zaituzte diseinatzaile bihurtuko eta ez dizute lagunduko logotipo bat egiten zure enpresarentzat, baina konposaketa errazak egin ahal izango dituzu, eta duintasunez zure oporren berri eman edo jaietan zoriondu, ikuspegi formal batetik behinik behin.

Canva

Diseinuko programa bat behar duen edozeinentzat aukera ona da, nahiz eta horren inguruko prestakuntzarik ez izan. Gainera, doakoa da. Berariazko edukietan sartzeko baino ez duzu ordaindu beharko, esaterako: irudi-galerian, hainbat maketatan eta beste funtzionalitate batzuetan (hala nola, zure letra-tipoak erabiltzeko aukeran). Canvari esker, era guztietako konposaketak egin ahal izango dituzu sare sozial nagusietan erabiltzeko: post baterako elementu erraz batetik hasi eta merkataritza-aurkezpen konplexuago bateraino. Kartel bat edo flyer bat egin dezakezu, zuk nahi dituzun neurriekin, eta PDF formatura esportatu inprimatzeko. Gainera, letra-tipoen aukera handia eskaintzen dizu, eta zure argazkiak igotzeko aukera, aurrez egindako maketetan txertatzeko. Jakina, Canva ez da irudi-editorea, eta horregatik, argazkiei oso oinarrizko tratamenduak egiteko aukera baino ez du eskaintzen; kontrastea, distira eta kolorearen tenperatura, besteak beste. Baina online programa oso baliagarria eta intuitiboa da, eta zure jarduerari buruzko irudi dinamiko eta modernoa ematen lagunduko dizu.

Notegraphy

Notegraphyren goiburua, “Writing made beautiful”, irakurrita, tresna horrek nondik nora eramango gaituen jakin dezakegu gutxi gorabehera. Horrekin, testuak apaindu eta irudi formatuan esportatu ahal izango ditugu, sare sozialetan jartzeko. Horren abantailetako bat da PCrako, Androiderako eta iOSerako balio duela, eta hogeita hamar aukera baino gehiago eskaintzen dizkigu testu soil bat apeu deigarri bihurtzeko. Tresna horrekin indar handiko letra kapitular bat aukeratu ahal izango duzu, edozeinen arreta erakartzeko bezain erakargarria, eta zure negozioaren beharretara eta estilora egokituriko baliabide errazekin apaindu.

Piktochart

Infografia erakargarri eta iradokitzaileak sortzeko tresna onenetako bat da. Canvarekin gertatzen den bezala, Piktocharten txantiloi asko ordaindu egin behar dira, baina doakoek ere joko handia ematen dute eta aukera ugari eskaintzen dizkizute. Free bertsioan, online aplikazio horrek zazpi txantiloi desberdin ditu, eta zure sormena esploratzeko eta zerotik hasteko ateak irekitzen dizkizu. Hortik aurrera, diseinua zure gogora egokitzeko nahi dituzun gauzak sartu baino ez duzu egin behar. Tresnen erlaitzak balio bereizgarria ematen dio aplikazioari, grafikoak, bideoak eta mapak txertatzeko aukera ematen baitu. Benetan gomendagarria.

What the font

Tresna hau ez dago diseinuak egiten laguntzeko pentsatua eta ez dizu zure komunikazioak egiteko ideiarik emango, baina zer duzun gogokoen identifikatzen lagunduko dizu, zure branding elementuetan eta zure komunikazioetan sartzeko. What the Font tipografiaren Shazama da. Dauden milaka letra-tipoetako batekin maitemindu bazara, baina ez badakizu zein den, fotografia batekin identifikatzen lagunduko dizu tresna horrek.

Fotor

Irudien diseinuaren eta edizioaren neofitoentzat beste tresna harrigarri bat. Fotor online tresna bat da, collageak, zure sare sozialetarako azalak, zoriontzeko txartelak eta askoz ere gehiago editatzeko eta egiteko hainbat atal dituena. Erabilera oso intuitiboa du, eta programa abian jartzean gida erraz bat aurkituko duzu, hainbat aukeraren artean gidatuko zaituena. Fotor-ek testuak eransteko aukera ematen dizu eta sormen-iragazki eta marko asko eta asko eskaintzen dizkizu. Amaitzean, emaitza zure sare sozialetara igotzeko aukera ematen dizu. Diseinu-alorretik kanpoko edozeinentzat egundoko aukera da.

Ziurrenik, tresna horietako batek ere ez zaitu diseinatzaile grafiko ospetsu bihurtuko goizetik gauera; baina, erabili behar izan al dituzu inoiz diseinu errazen bat egiteko? Ezagutzen al duzu itxurako komunikazioak moduz egiteko aukera ematen dizun aplikazio harrigarririk? Parteka ezazu gurekin!