y luego Añadir a pantalla de inicio.
Euskadiko Emakume Ekintzaileen Elkarteak 10 urte baino gehiago daramatza emakumeen ekintzailetza sustatzen eta ikusarazten. Izaskun Rama egungo presidentearekin podcastaren atal berri honetan emakumeek euren negozioak martxan jartzeko dituzten erronkei buruz hitz egingo dugu.
Elkartearen jatorria
2013an, kafetegi batean, gauzak aldatzeko prest zeuden bost emakume ekintzailek bizia eman zioten EmakumeEkini. Izen horrek, “emakumeekin” eta “emakume” eta “ekin” hitzen batasunak uztartzen dituen hitz-jokoak, ederki islatzen du elkartearen helburua: ekintzailetzetan emakumeei babesa, laguntza eta ikusgarritasuna ematea.
Izan ere, kafearen inguruan igarotako solasaldi horietan, elkarteko sortzaileak konturatu ziren beren proiektuei aurrera egitea eragozten zieten muga asko genero desberdintasunetan oinarritzen zirela. Horregatik elkartu ziren erronka partekatu horiei aurre egiteko eta oztopo komunak gainditzeko tresnak garatzeko.
Hamaika urte geroago, EmakumeEkinek 6.000 emakumeri baino gehiagori eman die laguntza, eta erreferentziazko erakunde bihurtu da, non Euskadiko emakume ekintzaileek esperientziak partekatzen dituzten, elkarrengandik ikasten duten eta mekanismo erabilgarriak sortzen dituzten emakume izanik ekiteko erronkei aurre egiteko..
Lorpenak minimizatzea eta “autoerregateatzea”
Gainditu beharreko oztopoen artean, “txikismo”-rako joera dago. Horren arabera, emakumeek beren lorpenak gutxitzen dituzte “proiektutxoak” edo “enpresatxoak” bezalako terminoak erabiliz. EmakumeEkinen ustez, funtsezkoa da emakumeek komunikatzeko modu hori aldatzen ikastea eta egiten dutenaz argi eta harro hitz egitea. “Garrantzitsua da gauzak diren bezala adieraztea: enpresa bat daukat, proiektu bat daukat, talde bat daukat. Horrela, balioa ematen diegu”, azaldu digu Izaskunek.
Aurre egin beharreko beste erronketako bat “autoerregateatzea” da, emakume ekintzaileen artean nahiko zabaldua dagoen praktika bat baita, hau da, beren zerbitzuen eta proposamenen prezioa murriztea, bezero potentzialei aurkeztu aurretik ere, garestiegiak izateko beldur direlako. EmakumeEkin buru-belarri ari da lanean pentsamolde hori aldatzeko, bazkideen artean beren jarduerari prezio justuak jartzeko beharra sustatuz. “Prezio justua ez ‘baxua’ zentzuan, justiziako justuan baizik”, azpimarratu du elkarteko presidenteak. Horretarako, “Sufritu gabe saldu” bezalako programak eskaintzen dituzte, jarduera komertziala ikuspegi feministatik eta metodo berritzaileak erabiliz jorratzen duena.
Gainera, Izaskunek aholku handi hau utzi die emakume ekintzaile guztiei gure podcastean: “Egun batean proposamen bat egiten ari bazara eta prezioa jaisteko gogoa sartzen bazaizu, igo ezazu % 20 eta bidali”.
Pasadizoak, aholkuak eta emakumeen ekintzailetza ugari biltzen dituen atal osoa entzunez gero aurkituko duzun guztiaren laburpen txiki bat besterik ez da hau. Beraz, ez utzi biharko gaur egin dezakezuna eta sakatu play!
