Ostalaritza-negozio baten errentamendua: Zer izan behar duzu kontuan? - Gaztenpresa

Ostalaritza-negozio baten errentamendua: Zer izan behar duzu kontuan?

Duela hilabete bat baino gehiago hasi zinen honi bueltak ematen. Horrenbeste gustatzen zaizun eta egunero ikusten duzun taberna horren leihateetan “errentan” kartela ikusi zenuenetik, hain zuzen. Hasieran ez zenion garrantzi handiegirik eman, baina denbora igaro eta familiarekin eta lagunekin hitz egin ahala, patuak ostalaritzaren mundura bultzatzen zaituela dirudi. Alokairua izaten da bertan sartzeko aukerarik ohikoena: gaur egungo jabeak bere negozioaren errentamendua lagatzen badizu, negozio bat jarri dezakezu martxan, zerotik hasi gabe. Negozioei buruzko edozein erabaki hartzeko, Gaztenpresara joan eta irizpide eta gomendio jakin batzuk gogoan izan ditzazula gomendatzen dizugu. Jarraian azalduko dizugu.

 

Jarduera garatzeko aukerak.

Lehenengo aukera lokala alokatzea izaten da. Kasu horretan, errentamendu-kontratua alderdiek adosten dute eta Hiri Errentamenduen Legeak (PDF) zehazten duenaren araberakoa izaten da. Kontratu hori abokatu batek idatzi edo berrikusi behar du, hark lokalaren errentari gisa dituzun eskubide guztiak defendatu eta babestu ditzan. Eta etorkizunean arazorik izan ez dezazun.

Bigarren aukera dagoeneko abian den eta jada muntatuta dagoen establezimendu bat alokatzea da. Horri industria-errentamenduko kontratua deitzen zaio. Kontratuzko akordio horren bitartez, alderdietako batek ekonomikoki emankorra den eta elementu jakin batzuk dituen (lokala, makineria, altzariak, salgaiak, ekipo-ondasunak, jabetza intelektualaren gisako eskubideak, bezeroak, merkataritza-prestigioa…) ondare-erakunde baten ustiaketa uzten dio beste bati, prezio baten truke. Kasu horretan, kontratuak Kode Zibileko 1546. artikuluko eta hurrengo artikuluetako xedapenak bete behar ditu. Kasu horretan ere profesional batek berrikusi behar du kontratua.

Edozein kasutan, interesatzen zaigun establezimenduak dagozkion udal-lizentziak dituela ziurtatzea gomendatzen da beti.

 

Kontuan izan beharreko alderdiak

Jarraian, beti kontuan hartzea komeni den zenbait alderdi jasotzen dira:

  • Bildu lokalari eta negozioaren martxari buruzko iraganeko informazio guztia. Lokalaren egoera egiaztatu behar da, baita stocka, hileko mantentze-gastuak (ura, elektrizitatea, gasa, komunitate-gastuak…), bezero-mota, lokalaren beraren historia, ingurunearen azterketa, aplikatzen diren prezioak, pertsonen joan-etorri handiko lekua den ala ez, handik gertu dauden bulegoak, ikastetxeak edo dendak…
  • Ez pentsatu mauka bat aurkituko duzunik. Azkenaldian, ateak ireki eta ixten dituzten ehunka negozio daude. Askotan, behin eta berriz porrot egin duen negozio bat eskualdatzen da. Horrek ez du esan nahi zure negozio-ideiarekin aurrera jarraitu behar ez duzunik, baina aldaketa batzuk egin beharko dituzu.
  • Egiaztatu lokalaren lizentzia-mota, irekitzeko eta ixteko ordutegiak, musika-ekipoak baimentzen diren, jardueraren lizentzian jasotzen ez diren (eta eragina izan dezaketen) aldaketak egin diren…
  • Kontuz non sartzen zaren: Negozio bat eskualdatzen denean, eskuratutako enpresak aurretiaz zituen zorren erantzukizuna zure gain hartzen duzu egoera jakin batzuetan. Gai horietan aditua den abokatu batekin jarri behar da harremanetan, aholkularitza profesional egokia izateko.
  • Egin lokalaren azterketa: Zer aldatu behar duzu? Dekorazioa bakarrik? Jendeari eskainitako arreta? Pintxoak eta janaria? Eta zer da gomendagarriena, negozioa berriz orientatu eta, esaterako, gosari, goiz erdiko kafe eta bazkarietan espezializatuta dagoen lokal bat sortzea? Pub bat beharbada? Zein izango da zure xede publikoa?
  • Ez utzi ezer gertakarien esku: Hitz egin edariak banatzen dituzten enpresekin eta ikusi zer eskaintzen dizuten eta zein preziotan. Aurkitu kalitatezko produktuak dituzten eta zure hornitzaileak izan daitezkeen harategiak, fruta-dendak eta arrandegiak. Negozioaren etorkizuna bezeroei eskaintzen diezunaren araberakoa izango da.
  • Egiaztatu establezimenduko makineria: Hozkailuak, kafetera, sukaldearen egoera… Normalean, zure ostalaritza-negozioak aurrera egin ahal izateko ezinbestekoak diren mota horretako erremintak bigarren eskukoak izaten dira, eta beraz, erabilera-ordu asko izan ditzakete edo horien kontserbazio-egoera egokia ez izatea gerta liteke. Kontuan izan beharreko beste puntu garrantzitsu bat da eskualdaketaren prezioa adosteko orduan.
  • Ez izan beldurrik ingurune horretan taberna edo jatetxe gehiago daudelako. Horiek dei-efektua eragiten dute, eta ez aurkakoa. Baina horretarako, zure eskaintzak lehiakideena bezalakoa izan behar du, gutxienez: zaindu bezeroei eskainitako tratua, pentsatu gainerakoengandik bereiziko zaituen produkturen bat eskaintzeko aukera (oso ohikoa da pintxo edo platertxo jakin batzuk eskaintzeagatik tabernak ondo merezitako ospea bereganatzea)… Hau da, aztertu modu sakonean zure ingurunea, zure lehiakideak izango diren establezimenduak, hau da, horien batez besteko prezioak, eskaintzen duten kalitatea, ordutegiak, tratua, hara joaten den bezero-mota…

 

Eta hortik aurrera, pentsatu ostalaria bazina bezala. Eta horrek ez du esan nahi kañak ondo prestatzen jakitea bakarrik (baita ere). Idatzi:

Egin negozio-plan bat. Funtsezkoa da. Hau da, zenbat irabazi nahi duzun, zure helburua zein den. Izan kontuan hornitzaileek hileko zure gastu osoaren % 30-35 artean eramango dutela, lokalaren mantentze-gastuak (ura, argia eta abar) % 15 inguru izango direla eta alokairua beste % 10 inguru izango dela. Hori guztia aintzat hartuta, kalkulatu jarriko dituzun prezioak eta, zure kalkuluen arabera, egunero zenbat bezero beharko dituzun proposatutako errentagarritasuna lortzeko.

Oso garrantzitsua:  kontuak, egunean. Ostalaritza-negozio ugari joan dira pikutara gestio ekonomiko eta finantzario egokia ez izateagatik. Egin gastuaren kontrol zorrotza, berrikusi diru-sarrera eta gastu guztiak eguna amaitzean, eta planifikatu hilero gastatu behar duzuna. Ezustekoetarako diru-aurreikuspen bat izateak ere asko lagunduko dizu.

Jarri harremanetan inguruneko ostalaritza-elkartearekin. Batasunak indarra dakar, batez ere, zure lokala sustatzeko, etorkizunean zugandik gertu izango diren eta zure negozioan eragina izango duten proiektuak ezagutzeko, edo zergen gehiegizko igoera baten aurrean zure eskubideak defendatzeko orduan.

Azken gomendioa: aldatu lokalaren itxura. Dekoratu berriz, definitu berriz, eman zure estiloa. Gastatu neurriz, baina gogoratu inbertitu gabe ez dagoela irabazirik. Eta ez ahaztu Gaztenpresan eta LABORAL Kutxan zuri laguntzeko gaudela: jarri gurekin harremanetan zure negoziorako finantziazioa eta laguntza behar badituzu.

Iruzkinak 0

Utzi iruzkin bat

Zure e-posta helbidea ez da argitaratuko. Beharrezko eremuak * markatuta daude

*

HARPIDETU

Uso de cookies

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies, pinche el enlace para mayor información.

ACEPTAR
Aviso de cookies

Log in with your credentials

Forgot your details?