Zer dira abalak? - Gaztenpresa

Zer dira abalak?

Abalei buruzko informazio gehiago nahi baduzu, etorri Gaztenpresaren Euskadiko eta Nafarroako bulegoetara.

Abalak bermeak dira, eta haien bidez, kreditu-erakundeek egiaztatzen dute, mailegua jasotzen duenak behar beste bermeak ez baditu ere, titularkide batek titularraren ardura hartzen duela eta, titularrak ordaintzeari uzten badio, konpromisoa hartzen duela titularrak ordaindu gabeko diru-kopurua ordaintzeko.

Zer da mailegu batean abal-emailea izatea?

 

Eskuarki, bezero bati mailegua emateko, bankuek eta aurrezki-kutxek nomina finkoa izatea, ondasun higiezinak izatea edo kontu korronte saneatua izatea eskatzen diote; kasu horretan, bezeroak ez du abalik behar. Baldintza horietako bat betetzen zuenak –edo, diru-kopuru handien kasuan, bat baino gehiago– eta, beraz, bere kaudimena froga zezakeenak ez zuen abalik behar. Hala ere, finantza-krisiaren ondorioz, berankortasuna izugarri handitu da; beraz, kreditu-erakundeen eskakizun-mailak gora egin du, eta dirua maileguz emateko, abal-emaileak eskatzen dituzte.

 

Esaterako, banku eta kutxek hartu behar duten arriskua txikitzeko, abala eskatzen diete mailegu-eskatzaileei. Kontua da senide edo lagun bati abala emateko eskuzabaltasunak ondorio ekonomiko larriak izan ditzakeela abal-emailearentzat.

 

Zer gertatzen da maileguaren titularrak ordaintzen ez badu?

 

Ez-ordaintze bat badago, hartzekodunak (bankua edo aurrezki-kutxa) zordun nagusiari –hau da, mailegua eskatu duenari– eskatu behar dio zorra ordaintzeko. Erreklamazio hori idatziz egiten da: gutuna bidaltzen zaio zordunari, abisu gisa. Ordainketa batean edo bitan atzeratzea nahikoa izan daiteke bankuek eta aurrezki-kutxek kobratzeko kudeaketak hasteko. Ez-ordaintzeak zehatuta daude, maileguaren kontratuan jasota dagoenez. Banku edo aurrezki-kutxa bakoitzak erabakitzen du zehapena, baina, oro har, mailegurako adostutako interes-tasatik gorako zenbait puntutakoa izaten da. Isun hori garaiz ordaindutako hileko kuota bakoitzari aplikatzen zaio.

 

Maileguaren titularrak ez badu ordaintzen, egoeraren berri ematen zaio abal-emaileari, eta zor diren diru-kopuruak ordaintzeko eskatzen. Horrelakoetan, kreditu-erakundeek abala betearazteko epeak errespetatu behar dituzte, legez eta maileguaren kontratuan jasota baitago (eskuarki, hiru hilabeteko epea da, baina kasuan kasukoa da).

 

Abal-emaileak maileguaren titularrak zor dituen diru-kopuruak ordaindu behar ditu, bai eta zehapenak eta auzien –adibidez, epaiketen– ondorioz sortutako gastuak ere. Ondoren, nahi izanez gero, abalatutako pertsonaren hartzekoduna izan daiteke abal-emailea, eta abalatutako diru-kopuruak kobratzeko beharrezko lege-akzioak egin. Horretarako, baliagarria da kontrabermea: dokumentu publiko bat da, notario batek ere sinatu behar duena, eta haren bitartez, maileguaren titularrak konpromisoa hartzen du egindako zorra abal-emaileari ordaintzeko. Auzitegietarako jotzen bada, denbora gutxiago beharko da kontrabermeari esker, abal-emaileak ez baitu frogatu beharko titularrak dirua zor diola (dokumentu hori gabe, ordea, frogatu egin beharko luke).

 

Abal-emaileak zorra ordaintzen badu, kreditu-erakundeak ez du gehiago eskatzen, eta mailegua aurrera doa. Alabaina, erakundeak ez badu lortzen abal-emaileak zorra ordaintzea, demanda judizial bati ematen dio hasiera. Demanda hori gauzatuz gero, maileguaren titularraren eta abal-emailearen ondasunak bahitzeko eskatzen da. Harrigarria bada ere, erakundea ez dago behartuta zordunaren ondasunak lehenago bahitzera; izan ere, abal-emailearen ondasunak bahi ditzake zuzenean. Gainera, abal-emaile bat baino gehiago badaude, haietako baten ondasunak bahi ditzake zor guztia estaltzeko, eta ez dagokion zati proportzionala estaltzeko.

 

Abal-emailea izateak arriskuak ditu berekin, eta egoera ezatseginik ez izateko, komeni da arrisku horiek azaltzea. Beraz, maileguaren eskriturak egiten direnean, abal-emailea hala azalduko da, eta orduan ezarriko dira abalaren funtzionamendua arautuko duten klausulak. Kontuan izan behar da, kontrakoa adostu ezean, erakunde mailegatzaileak ez diola abal-emaileari jakinarazi behar mailegua ez dela ordaindu, eta jakinarazpen judizial baten bidez jakitea dela ohikoa. Hori dela eta, gomendatzen da maileguaren kontratuan ezartzea kreditu-erakundeak ez-ordaintzea gertatu dela jakinarazi beharra.

Abalei eta abal-emailea izatearen arriskuei buruzko informazio gehiago nahi baduzu, Gaztenpresako taldeak aholku emango dizu atseginez. Etor zaitez Bilboko, Donostiako edo Gasteizko bulegoetara.

 

Iruzkinak 0

Utzi iruzkin bat

Zure e-posta helbidea ez da argitaratuko. Beharrezko eremuak * markatuta daude

*

HARPIDETU

Uso de cookies

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies, pinche el enlace para mayor información.

ACEPTAR
Aviso de cookies

Log in with your credentials

Forgot your details?