Emakumeak eta ekintzailetza Neskworking-aren eskutik - Gaztenpresa

Emakumeak eta ekintzailetza Neskworking-aren eskutik

Emakumea eta ekintzailea. Pixkanaka, EmakumeEkin gisako elkarteei eta Neskworking gisako ekitaldiei esker, gure gizartean pisua hartzen ari den binomioa. Susana Zaballa bi horietako kide da, eta networking-ekitaldi berezi horren gakoak azaldu dizkigu.

 

– Gaztenpresa Bloga: Zein da, oro har, EmakumeEkin elkartearen eta, bereziki, Neskworking ekitaldiaren helburua?

– Susana Zaballa: EmakumeEkin elkartearen helburua emakumeek abiarazitako ekintzailetza sustatzea eta babestea da. Neskworking ekitaldiaren helburua beste emakume ekintzaile batzuekin harremanak finkatzea eta lotura profesionalak sortzea da, gertutasunez eta modu atseginean. Gainera, mota horretako ekitaldiekin emakume ekintzaileek egiten dugun lana ikusarazi nahi dugu.

 

– G.B.: Zergatik parte hartu Neskworking ekitaldian?

– S.Z.: Dibertigarria, ahalduntzeko lagungarria eta emankorra izango delako.

 

– G.B.: Zein da Euskadiko emakume ekintzailearen gaur egungo egoera? Nolakoa izan da azken urteetako bilakaera?

– S.Z.: EAEko pertsona ekintzaile guztien % 40 inguru emakumeak gara, proiektuaren sortze-fasean nahiz finkatutako enpresetan. Dena den, pertsona ekintzaile potentzial guztien ia % 50 gara (2014ko Global Entrepreneurship Monitor txostenaren arabera); beraz, hurrengo urteetan gure partaidetzak gora egingo du, seguruenik, enpresa arloan.

 

– G.B.: Zein dira emakumeek ekiteko orduan aurre egin behar dieten oztopo nagusiak?

– S.Z.: Printzipioz, gizon ekintzaileek aurre egin behar dieten berdinak dira: finantziaziorik eza, gobernuaren politikak eta gizarte-arauak. Halere, emakumeek oztopo erantsiak izaten ditugu gure rol kulturalen eraginez; esaterako, familia-kargen edo genero-estereotipoen pisu handiagoa izaten dugu, eta horiek gure buruarekiko konfiantza murrizten dute ekiteko orduan.

 

– G.B.: Zer ekarpen egiten dio emakumeen ekintzailetzak enpresa-ekosistemari?

– S.Z.: Oraindik ez dakigu, gure ustez oraindik ez baitago guztiz garatuta, baina ekarpen handia egingo diola pentsatzen dugu. Emakumeek ekintzailetzara hurbiltzeko beste modu batzuk ditugu, besteren konturako lana garatzeko beste modu batzuk ditugun bezala. Bestalde, gaur egungo eredua gauzak gizonezkoen modura egiteko prestatuta dago, eta normalean, emakumeak molde horretan sartzen saiatzen gara profesionalki hazi ahal izateko. Horrenbestez, ekarpen garbi bat aniztasuna izango litzateke.

 

– G.B.: Emakumeen ekintzailetzari dagokionez, zein izango litzateke gure buruak ikusi ahal izateko ispilurik egokiena?

– S.Z.: Madrilen, EEAGRANTS funtsek babestutako ekimen bati esker, beste herrialde batzuetako emakume ekintzaile eta enpresarien elkarteekin bildu ginen: Islandia eta Norvegia. Gainera, Londresen, The Young Foundation Fundazioak babestutako gizarte-ekintzailetza arloko proiektu gisa aukeratu gintuztenean, Gender Futures ekimenaren arduradun batekin lanean aritu genuen. Erresuma Batuan ere gurearen antzeko panorama bizi dutela sentitzen dugu. Norvegian eta Islandian, ordea, eta batez ere Norvegian, askoz garbiago ikusten dute, gizarte gisa, ezin dutela talentu erdia bazterrean utzi; beraz, oso ekimen interesgarriak jarri dituzte martxan. Horietako batzuk gure proiektuetara txertatu ditugu. Edonola ere, kulturaren, ekonomiaren eta enpresaren testuingurua behar bezala hartu behar da kontuan jardunbide egokiak errepikatzeko orduan. Kopiatzearen aldekoak gara, baina ingurunera egokituz.

 

– G.B.: Zer esango zenieke ekiteko asmoa duten, baina azken erabakia hartzen ez duten emakume horiei?

– S.Z.: Zure lanbide-karreran aukera hori irekitzeko ausardia izatea oso aurrerapauso esanguratsua da dagoeneko. Horretarako motibazioa sentitzen badute, informazioa jasotzea da onena. Gurearen gisako erakundeetara gerturatu, eta bertan, beren zalantzak planteatu eta laguntza emozionala eta teknikoa jaso dezakete. Esperientziak partekatzeko foro bat gara, besteak beste. Zure beldurrak eta ametsak beste pertsona batzuengan islatuta ikusteak konfiantza eta adorea ematen dizu. Badira beste erakunde batzuk ere, Gaztenpresa esaterako. Hark beti lagundu izan digu, eta maila guztietan eskaintzen du laguntza, ekintzailetza-prozesua dena dela.

Iruzkinak 0

Utzi iruzkin bat

Zure e-posta helbidea ez da argitaratuko. Beharrezko eremuak * markatuta daude

*

HARPIDETU

Uso de cookies

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies, pinche el enlace para mayor información.

ACEPTAR
Aviso de cookies

Log in with your credentials

Forgot your details?